NANGANTI ang Davao City Police Office (DCPO) nga ilaha gayud nga ipatuman ang “One-strike policy” sa kapulisan ugaling dunay mamatay nga tawo nga hinungdan sa pabuto karong pagsaulog sa Pasko ug pagsugat sa Bag-ong Tuig.
Kini ang gibutyag ni Davao City Police Office (DCPO) spokesperson Ma. Theresita Plaza-Gaspan human sa paggawas sa direktiba gikan sa taas nga kinahanglan ipatuman gayud sa matag istasyon nga paneguraduhon nga walay mga pabuto nga ginabaligya sa ilang matag area of responsibility (AOR).
“Ipatuman gayud nato ang atong city ordinance labot sa firecracker. Kung mahitabo nga dunay manggawas nga mga pabuto sa ilang mga AOR, atoa gayud nga paimbestigahan, labi na og naay casualties na mapatuman gayud pod nato ang ‘One-strike policy,’” ingon ni Gaspan.
Andam sab nga mopasaka og kaso ang DCPO sa bisan kinsa man ang madakpan nga magpabuto ug magbaligya og pabuto sa pagselebrar sa Pasko ug pagsugat sa Bag-ong Tuig.
Ang City Ordinance No. 060-02 of 2002 kun Ordinance Prohibiting the Manufacture, Sale, Distribution, Possession or Use of Firecrackers or Pyrotechnic Devices, 16 ka tuig na kining gipatuman sa Davao City. (Richy F. Nalagon)