NANGHATAG og pinaskohan ang kapulisan sa Mandaue Police Station 5 ngadto sa mga lumulupyo sa dumpsite sa Barangay Umapad, Dakbayan sa Mandaue kagahapon, Disyembre 18.
Nakadawat sila og mga pagkaon sama sa duha ka kilo nga bugas, noodles, toyo, suka ug canned goods.
Matod ni Police Chief Inspector, Mercy Villaro nga adunay 100 ka pamilya ang ilang natagaan og pinaskohan.
“Niadto mi sa Barangay Umapad ang among gipili na area, ang target namo nga barangay area nga makahatag mi og bundles of joy, aduna mi 100 ka families nga nahatagan,” matod niya.
“Naghatag mi og mga bugas ug delata para maka share sad sa among blessings,” dugang ni Villaro. Si Elena Baguio, 32, minyo, adunay unom ka mga anak, usa sa mga nakadawat sa maong pinaskohan, nagpasalamat sa ilang nadawat.
“Mapasalamaton mi kay naka dawat mi og pinaskuhan. Dako na kaayo ning tabang namo tungod kay ang among pangita ang pangaykay ra gyud ug unta padayonon nila ni sunod tuig,” matod ni Baguio.
Si Herlita Tac-an,31, minyo, adunay unom ka mga anak nga gibati siya og kalipay tungod sa nadawatan nilang pinaskohan.
“Lipay kaayo mi, kay bisag gamay naa gihapon mi nadawat,” matod niya.
Kapin na sa duha ka mga dekada silang nangaykay og mga basura uban sa iyang bana.
“Lipay kaayos tanan kay kinasing-kasing sad to nga pagpanghatag, padayunon unta nila bisag matag Disyembre lang gud. At least malipay lang mi ba,” dugang niya.
Gibutyag ni Villaro kon asa gikan ang budget sa mga pinaskohan nga ilang gipang gahin sa mga lumlupyo sa Umapad.
“Kana nga money gikan na sa mga ginansya sa mga ni-loan where in tanan police office naay cooperative ug budget sad na sa among city director,” subay ni Villaro.
Si Villaro miingon nga aduna pa sila’y second batch sa ilang gitawag nga “Pamaskong Handog” nga mahitabo karong December 28 apan wala pa sila makahibaw asa nga lugar sila manghatag.
Giklaro sab niya nga padayonon nila ang pagpanghatag og tabang dili lang sa panahon sa pasko. Kiziah Marie T. Suello & Jolissa Mae Taboada, USJ-R Interns