IPAUBOS na sugod karong Biyernes ang tanang pampubliko nga tambalanan sa Code White alert.
Kini aron pagpangandam sa umaabot nga Pasko ug Bag-ong tuig.
Matod sa pangulo sa Health Emergency Management Service (HEMS) Dr. Shelbay Blanco nga sa Disyembre 21 hangtod Enero 4 ang pagpahigayon sa Code White sa mga tambalanan.
Kini nagpasabot nga andam ang mga tambalanan hilabi na ang mga pampubliko nga mo-responde sa bisan unsa nga kakulian hilabi na kining mga biktima sa pabuto.
Giawhag usab sa Department of Health ang tanang pribado nga tambalanan nga mao usab ang buhaton.
Ang code white isaka kini sa panahon nga aduna’y mga dagkong kalihokan nga gikatakdang mahitabo nga nagkinahanglan og halapad nga medikal nga atensyon.
Kahinumduman nga mas nikunhod ang natala sa DOH 7 nga biktima sa mga nabuthan.
Kini tungod usab sa hingpit nga pag-regulate sa pagpamaligya og pabuto.
Moabot lang sa 54 ka tawo ang nabuthan sa pabuto niadtong 2017 kon itandi sa 63 ka biktima sa 2016. HBL