Pagtugot sa PB wala kinahanglana: Davide

WALA mabalaka si Gobernador Hilario Davide III nga gi-defer lang una sa hunta probinsiyal kon hatagan o dili ba siya og awtoridad pagpirma sa kontrata tali kaniya ug WT Construction nga maoy winning bidder sa pagatukuron nga edepisyo sa provincial resource center.

Karong adlawa, duna hinuoy gitakda nga special session aron tiwason ang pagtuki niini.

Kon kahinumdoman, niadtong Disyembre 17 atol sa session, moabot sa walo ka mga board member ang nipabor sa deferment, laing walo ang nisupak niini samtang usa ang ni-abstain.

Gibotohan sab niini ang aktwal nga resolusyon nga mao nay maghatag sa awtoridad ngadto sa gobernador diin walo ang nipabor, unom ang nisupak ug tulo ang ni-abstain.

Hinuon wa mahimong opisyal ang maong botasyon sanglit gipaabot pa sa PB ang opinion sa Department of Interior and Local Government kung gikinahanglan ba ang simple o qualified majority pag-desisyon sa maong lakang.

Gipadayag ni Davide nga dili problema alang kaniya kon hatagan o dili ba siya og awtoridad sa mga sakop sa PB.

Matod niya, dunay supplemental budget nga napasar karong tuiga nga nag-gahin og pondo nga ibayad sa kantidad nga gi-utang gikan sa Development Bank of the Philipppines, nga mao say gamiton pagpatukod sa edipisyo.

Gipasabot sa gobernador nga igo na kini aron mapadayon ang proyekto kay gi-aprubahan man sab kini sa HUnta Probinsiyal.

“But on the matter of authority, katong (supplemental) budget we approved the budget, naa naman gud to ang item didto bahin sa 20-storey (building). My feeling is, mao lang ni akong personal view pud and some lawyers here also share my view, nga di na diay kinahanglan og authority because it’s already in the budget, pursuant to the Quisumbing ruling,” niingon si Davide.

Sigun sa Provincial Budget Office, napasar ang supplemental budget nga nag-gahin og bayad sa loan niadtong buwan sa Hunyo karong tuiga. AZLG