HUMAN ang usa ka buwan niya nga bakasyon, nangayo og laing usa pa ka buwan nga extention niini si Daanbantayan Mayor Vicente Loot.
Si Loot, kinsa kontrobersiyal human pila ka higayon gipasanginlan ni Presidente Ronald Duterte nga nalambigit sa ilegal nga drugas, nihangyo kang Gobernador Hilario Davide III nga i-extend ang iyang leave hangtod Enero 17, 2019 aron mas taas ang panahon nga makauban niya ang iyang mga igsuon sa Amerika.
Matod niya, magdungan silang tanan pagsugat sa Pasko ug Bag-ong Tuig.
Nisuwat kang Davide si Loot niadtong Disyembre 5. Nadawat kini sa buhatan sa gobernador niadtong Disyembre 11.
Unod sa suwat ang hangyo ni Loot nga malugwayan ang iyang vacation leave og laing usa ka buwan o gikan Disyembre 18, 2018 hangtud Enero 17, 2019.
Nibakasyon si Loot sugod niadtong Nobiyembre 18 hangtod Disyembre 17 aron bisitahon ang iyang mga igsuon nga naka-base sa Amerika.
Matod ni Loot ang gipangayo niya nga extention sa iyang special leave gamiton niya aron dungan nila nga masugat sa iyang mga igsuon ang Pasko ug Bag-ong Tuig didto gihapon sa Amerika.
“Considering the distance and the years that the family has not been together, I found this an opportune time to spend with them while they are still alive. To recall, I have 5 sisters, some of whom are octogenarians, 3 of whom are residing in the USA and two in Canada,” padayag sa mayor diha sa iyang suwat.
Matod sa mayor nga sukad siya natawo, wala sila magkadungan sa iyang mga igsuon sa pagsaulog sa maong mga okasyon.
“I have realized that I haven’t celebrated Christmas and New Year with them since I was born. Given this chance that I am here with them now this Yuletide Season, I believe spending it with them will give more meaning and memories to our lives as a family,” niingon si Loot.
Sukad niadtong Mayo karong tuiga, wa na igkita si Loot sa publiko human usab sa suway nga pag-ambush kaniya ug sa iyang pamilya sa mga wa pa mailhing mamumuno.
Si Loot, nga usa ka kanhi pulis-opisyal, pipila na ka higayon nga gihinganlan ni Presidente Rodrigo Duterte nga usa ka drug protector.
Dunay mga pagduda nga nagtago-tago na siya nunot sa pag-gukod sa Duterte administration sa mga gituohang nalambigit sa ilegal nga drugas.
Giaprobahan
Giaprubahan hinuon ni Davide ang hangyo ni Loot ug nihatag kinig laing authority to travel sa mayor alang sa extention sa iyang leave.
Gi-aprubahan ang authority to travel niadtong Disyembre 13, 2018.
Gipahimangnuan sa gobernador si Loot nga i-charge sa iyang personal account ang gasto sa iyang biyahe.
“You are hereby granted authority to travel to the United States of America from December 18, 2018 to January 17, 2019 for vacation,” padayag ni Davide sa giluwatan nga memorandum alang sa mayor.
“All expenses incurred in your travel shall be charged to you personal account,” dugang ni Davide.
Subay niini, si Daanbantayan Vice Mayor Gilbert Arabis magpabilin isip acting mayor sa lungsod hangtud mahuman ang bakasyon ni Loot. Nadawat na ni Arabis ang kopya sa komunikasyon ni Loot sa Kapitolyo ug ang approval ni Davide niini.
Gipaniguro hinuon ni Arabis nga bisan og wala ang ilang mayor, di apektado ang paghatag og serbisyo ngadto sa katawhan sa Daanbantayan.