UPAT ka gikatahapang mga durugista napatay sa managlahing mga police operation sa duha ka mga dapit sa Dakbayan sa Talisay sayo sa buntag sa Martes, Disyembre 18.
Kapin sa usa ka kilo nga shabu ang nasakmit sa kapulisan.
Unang nangamatay sila si Rodel Nacario ug Kevin Baguio human giingong ningsukol sa buy bust operation sa mga sakop sa Talisay Police mga alas 3:55 sa kadlawon sa Brgy. Bulacao.
Si Supt. Marlu Conag, hepe sa Talisay Police Station nga nahinabi sa mga tigbalita, niingon nga ang duha nakabantay nga pulis ang ilang gika-transact, kalit nga namusil hinungdan nga nahitabo ang pinusilay.
Si Conag nibutyag nga si Nacario, sakop sa drug lord nga si Steve Go, samtang kauban sab si Baguio nga gikatahong gun-for-hire.
Ang duha kaniadto pang nangandak ug nipadayag nga andam silag tagana sa pagpatay og mga pulis hinungdan nga wa sila mokumpiyansa.
Ilang nakuha gikan sa duha ang usa ka dako nga putos sa shabu, usa ka medium ug small nga pakite sa shaba, lakip ang usa ka .38 kalibre nga armas ug .357 revolver.
Paglabay sa tulo ka oras, laing duha ka gikatahapang drug pushers nga giingong gun-for-hire nangamatay human ningsukol sa buy bust operation sa Provincial Intelligence Branch (PIB) sa Cebu Provincial Police Office (CPPO) sa may Sitio Manguilamon, Brg. Jaclupan, kagahapon sa alas 7:00 sa buntag.
Patay ang managsuong silasi si Rodrigo ug Noel Alvarez, pulos hingkod.
Usa ka kilong shabu
Si Sr. Inspector Alejandro Batobalonos, hepe sa Provincial Drug Enforcement Unit (PDEU) sa CPPO ug Provincial Intelligence Branch (PIB) nibutyag sa mga tigbalita nga mo-abot sa tulo ka semana ang ilang pag-monitor.
Ang duha gikan sa Barangay Duljo Fatima, Dakbayan sa Sugbo, apan diha sa Talisay ang mga hideout.
Giingong nakapalit silag luna sa dapit ug gitukuran sa ilang balay hinungdan nga dugay kaayong nabisto.
Sa operation kagahapon, nakabantay ang duha sa mga operatiba ug namusil hinungdan sa pinusilay.
Matod pa ni Batobalonos nga ang drugas nga ilang nasakmit gilubong sa magsuon sa yuta gamit ang balde.
Ang maong drugas moabot og 1.2 ka kilo nga mobalor og P8.1 milyones.
Lakip sa nasakmit ang duha ka kalibre .45 nga armas.
Nasikop sab ang laing unom ka mga tawo nga sakop sa mga suspek nga naglangkob nila ni Randyl Añabeza, 27; Johnrey Vitor; Jackson Ogong; Christopher Infiesto; Neilrenz Francisco ug Wlifredo Narsico.
Text message
Si Conag, sa interbyu sa Superbalita Cebu, niingon nga nakadawat silag mga impormasyon gikan sa mga lumolupyo sa Bulacao.
Matod niya nga nakita sa mga concerned citizen nga tinud-anay ang kampanya sa kapulisan batok sa illegal drugs.
Kusog ang pagpamaligyag illegal drugs sa dapit.
Sa ilang operasyon kagahapon, mga lumolupyo ninghatag og kompletong detalye hinungdan nga kini malampuson.
“Nakita siguro nila na marami na kaming accomplishments sa ibang brgy. That earns siguro their trust,” pasabot ni Conag.
Iyang gihulagway si Baguio nga sakop og gun-for-hire group.
Si Bulacao Barangay Kapitan Banjo Abastillas nisulti sa Superbalita Cebu nga sa lugar kon diin gihimo ang buy bust, kaniadto ra kusog ang pagpamaligya og drugas.
Mao sab kini ang tagoanan sa high value targets (HVT).
Si Abastillas niingon nga tungod kay baligyaanan kini og illegal drugs, daghan ang mga day-o, lakip na ang duha nga napatay.
Sila si Baguio ug Nacario wa maapil sa drug watchlist sa barangay kay di taga diha.
“Daghang na kaayog mga drug personalities diha na nadakpan na, despite that hangtod karon anaa lang gihapon,” dugang ni Abastillas.
Lehitimo
Gipanalipdan sa hepe sa Police Regional Office 7 ang mga pulis sa syudad sa Talisay ug sa Provincial Intelligence Branch nga nakapatay sa mga drug personalities.
Matod ni Chief Supt. Debold Sinas nga lihitimo ang gihimo sa iyang mga sakop sanglit nagdepensa lang sila sa ilang kaugalingon.
Iyang gidasig ang Commission on Human Rights (CHR) nga mohimog imbestigasyon.
“Accordingly, kabalo na man ka sa Talisay karon kay kabalo na sila sa pulis. So, nag ready diay sila. So, sa dihang kabalo sila nga pulis ang nagpalit sa ilaha, namusil pud sila mao nang ang pulis nag defend lang sa ilang kaugalingon,” matod ni Sinas.
Sa imbestigasyon sa kapulisan sa probinsya sa Sugbo, nasuta nga tulo ka semana nga gipanid-an sa intelligence branch ang illegal nga kalihukan nilang Alvarez ug mga kauban.
Matod ni Sr. Supt. Manuel Abrugena nga tulo ka buwan pa nga mibalhin ang mga suspek sa barangay Jaclupan gikan sa Barangay Duljo Fatima sa syudad sa Sugbo ug didto na usab namaligya sa illegal nga drugas.
Giingong human ang sub-sub nga kampanya sa kapulisan sa syudad sa Sugbo, namalhin pagpuyo ang magsuong Alvarez kauban ang iyang mga kunsabo.
“Nuong magkaroon po ng sunod-sunod na operation ang Cebu City (police) lumipat po yung magkapatid sa barangay Jaclupan. They build a piggery their at yun po ang ginagamit nilang front sa kanilang illegal drug transaction,” matod ni Abrugena.
Nagtuo si Abrugena nga gikan niadtong magnetic lifter nga nakalusot sa Bureau of Customs sa kaulohan ang nakuhang supply sa illegal nga drugas tungod kay susama kinig kolor nga yellow sa mga nakuhang drugas sa syudad sa Sugbo. GPL, AYB & Seismundo H. Angelo-USJ-R Intern