Guihulngan police chief girakrakan, patay

DEPUTY Chief sa Guihulngan City Police Station ang gipusil patay alas 10:25 karong buntag, Disyembre 19, sulod sa usa ka kan-anan atbang lang sa ilang buhatan.

Ang biktima giila nga si Police Senior Inspector Porferio Gabuya Jr., taga syudad sa Sugbo apan kasamtangan nga deputy chief sa Guihulngan Police Station.

Duha ka wala mailhing armadong lalake nga sakay og motorsiklo ang kalit lang naabot samtang nag inom og kape si Gabuya ug dayong paarak sa dala niining armalite tumong sa biktima.

Nakaangkon ug daghang samad sa lawas si Gabuya nga gidali pagdala sa labing duol nga tambalanan sa syudad apan gi deklara kini nga dead on arrival.

Si Gabuya ang station chief sa Talamban Police Station sa Cebu City Police Office hantud Disyembre 2016.

Niadtong March 2018, niserbisyo siya isip officer-in-charge sa Parian Police Station human gipang-ilisan ang 43 ka pulis sa maong istasyon ug mga miyembro sa Cebu City Mobile Force Company.

Kini gihimo human nadakpan sa entrapment ang usa ka Police Officer 3 nga nangikil sa usa ka drug suspect nga gisaaran nga wagtangon ang kaso ug buhian kini kung mubayad. (With JOB of SunStar Cebu)