SIGURADONG malipayon ang selebrasyon sa Pasko ug Bag-ong Tuig sa mga empleyado sa Kapitolyo Probinsyal human gipahibalo ni Misamis Oriental Governor Bambi Emano atol sa pagpakayab sa nasudnong bandila nga ubay-ubay nga bonus ang madawat sa mga trabahante.
Dihang gihinabi sab kini sa mga sakop sa prensa sa Cagayan de Oro gipahibalo niini kon pila ang kantidad nga madawat sa mga trabahante.
Gibutyag niini nga sa petsa Disyembre 21 makadawat sa ilang cash gift nga P5, 000 ang tanan empleyado sa kapitolyo lakip na ilang sweldo ning bulan.
Samtang lakip sa ihatag ang programs for rewards and incentives for services excellence for qualified employee nga mobalor og usa ka sweldohan.
“Kung nagsweldo ka og P20, 000 ang bulan, P20, 000 sab nga kantidad imong madawat ug modoble siya,” matud ni Emano.
Dugang niini nga aron sab aduna pay pang Bag-ong Tuig ang mga empleyado ihatag pagka petsa 28 sa Disyembre ang productive enhancement incentive nga mobalor og P2, 000.
Apan dismayado lamang ang gobernador sa mga gipakitang kaluya sa mga empleyado diha sa pagkanta sa nasudnong awit ug unta ang mga empleyado alerto buntag pa sa adlawng Lunes.
Dili maayo nga ehemplo nga galuya sa labing unang adlaw sa trabaho ug kon magpadayon kini basin magduha-duha siya sa pagpa-release sa cash gift sa sunod nga pasko.
“Galuya naman gani kamo nga adlawng Lunes pa unsa nalang kaha sa pagka Martes, Miyerkules, ngadto Biyernes unsaon ninyo pagpanarbaho niana?” matud ni Emano ug nanghinaot dili na kini mausab. (SVB)