GIILA na ang mga winners nga may nindot kaayong istorya sa #CacaoDavao Best Storytelling contest nga gipaluyuhan sa Department of Agriculture (DA)-Davao Region.
Ang kontest gilusad sa tumong nga mas mailhan pa ang Davao, dili lamang tungod sa Durian, apan tungod sab sa lamiang cacao.
Suma pa usa ka estudyante ang miangkon sa Best Story ug People's Choice Award.
Siya si Hannah Albi Sajid, nga midawat og P20,000 cash nga premyo, ug laing P10,000 sab human sab mapili nga “People's Choice Award” ang iyang entry.
Ang awarding gihimo sa nakalabay nga Lunes sa Apo View Hotel ning siyudad.
Ang entry ni Hannah naghisgut sa ka-importansiya sa ilang pagpananum og cacao nga maoy tinubdan sa ilang inadlaw nga kinitaan. Niya, sa ilang pamilya nga may 18 ka miyembro, di katuohan nga napatungha sila, inubanan sa paningkamot sa ilang ginikanan ug pagpanguma og cacao.
“Everything that we do, we value most of it. Yes! We are farmers, not just farmers but proud cacao farmers,” tipik sa Facebook post entry niya.
Samtang ang lima ka finalist nga midaug sab og tag P5,000 nga cash prize mao sila Joemar Faelnar, Raymart Angelo Plasabas, Jamille Fortades, Jason Te Occidental ug God-Levi Santiago.
Nasayran nga anaa sa 150 ka entrante ang natigum, dayon gipilian kini og nahimong Top 40, ngadto Top 20, hangtud sa napili ang Top 6 finalists, lakip na Best Story ug People's Choice Award.
Atol sa awarding, gipangunahan kini ni DA-Davao regional director Ricardo Oñate, Jr., uban niya sila Charita Puentespina sa Malagos Chocolate, Mary Grace Belviz sa Rosario Chocolates ug Neil Santillan sa MS3 Agri Ventures.
Nagsilbi sab nga hurado sa kompetisyon mao sila award-winning graphic artist and film maker McRobert Nacario, Sun Star Davao social media strategist Ace June Rell Perez, ug Department of Trade & Industry Information Officer Jenny Grace Mendoza.