BULAN karon sa pagminahalay, paghinatagay, pagpasaylo ug labaw sa tanan dili unta nato kalimtan ang pagpasalamat sa atong labaw'ng Makagagahum sa gasa nga atong nadawat sa tibuok tuig sa 2018. Pila ka adlaw na lang mapupos na ang tuig ug hinaut andam na ta alang sa sunod tuig nga umaabot.
Sa sugilanon nga mabasa sa basahon ni San Lukas, kapitulo 17, mga bersikulo 12-17, nagsaysay kini sa 10 ka mga sanglahon nga miduol kang Hesus ug nagpakiluoy nga tambalan.
Dihang nanglakaw na sila, nakita sa usa ang kalit nga pagkaayo sa iyang panit ug nawagtang ang sangla busa dali siya nga mibalik, miluhod ug nagpasalamat nga naayo na siya.
Nangutana si Hesus nga nagkanayon, dili ba 10 man sila nga naayo? asa naman ang siyam?
Daghan ang mangita sa tabang sa Diyos panahon nga naa sa panginahanglan labi na panahon sa kalisud. Daghan ang mag-ampo alang sa panabang gikan sa Kahitas-an apan pipila lang ang mahinumdom pagpasalamat sa Diyos o sa isig-ka-tawo panahon sa kaharuhay.
Nakatambong ko isip dinapit sa gihimong Christmas party sa kampo ni PBA Partylist Representative Jericho “Koko” Nograles niadtong Lunes sa gabii aron pasalamatan ang mga sakop sa media nga nakatabang pagsabwag sa mensahe unsa ang nabuhat sa kongresista alang sa katawhan.
Sa ngalan sa tibuok pamilya sa Nograles, nag-inusara siyang miatubang aron ipaabot ang pasalamat ug ang mga gasa nga iyang giandam aron malipay ang mga media tungod kay pasko man.
Sa unang higayon nga wala makatambong si Congressman Karlo Alexei Nograles tungod sa mga buluhaton isip bag-ong sinaligan ni Presidente Rodrigo Duterte nga nagtudlo kaniya nga Cabinet Secretary hulip kang Leoncio Evasco Jr. nga mi-file sa iyang kandidatura pagka-governor sa probinsiya sa Bohol.
Subli nga nagpasalamat si Koko sa malinawon nga dagan sa politika sa dakbayan sa Davao ug ang pagsinabtanay sa kampo sa Nograles ug Duterte diin nahimong hugot na karon ug tinud-anay ang ilang suporta sa mga programa ni Presidente Duterte.
Sa panaghiusa nga ilang nakab-ot, mas daghan ang kalamboan nga mapaabot sa katawhan sa Davao labi na sa 1st District.
Gikan sa pamilyang Nograles, iyang ginapaabot sa tanang Dabawenyo ang pasalamat ug panghinaut sa malambuon ug malipayon nga bag-ong tuig.
Ato sang ipadaplin ang mga isyu sa politika ug uban pang butang nga angay masayran sa katawhan samtang atong saulogon ang kapaskohan.
Merry Christmas sa atong mga sumosunod ug malipayon nga pagsugat sa 2019.