GIPAKITA sa San Miguel Beermen nga kaya pa nilang palig-unon ang grabe na ka lig-on nilang puwersa sa Philippine Basketball Association (PBA).
Ang Beermen nakamaniubra pagkuha nila ni Terrence Romeo, Paul Zamar ug Ronald Tubid nga wala matarog ang kinauyokan sa ilang puwersa nga mao ang gitawag og Super Six.
Gumikan niini, dili ikahibulong nga adunay mga ninghulagway sa Beermen nga maoy bersyon sa PBA sa Golden State Warriors sa National Basketball Association (NBA).
Apan misupak si Beermen coach Leo Austria niini. Gipasabot ni Austria nga daghan gihapon silang angayang trabahuon aron makabira pagbalik og kampiyunato.
“It’s up to us kung paano namin imo-motivate yung players to play to the expectations of the people,” matod sa three-time PBA Coach of the Year sa interbyu sa Spin.ph.
Adunay punto si Austria.
Mao sab kini ang senaryo nga nagpalibot sa Beermen dihang ilang nadugang sa ilang puwersa si No.1 rookie Christian Standhardinger.
Ang Beermen mingkampiyon sa Philippine Cup nga wala si Standhardinger apan sa paghiabot sa Fil-German sa ilang tugkaran, pakyas sila sa pagsakmit sa korona sa Commissioner’s Cup ug Governor’s Cup.
Si Standhardinger nahilakip sa mga naglangkob sa Super Six sa Beermen nga gilangkuban sab nila ni June Mar Fajardo, Arwind Santos, Chris Ross, Marcio Lassiter, ug Alex Cabagnot.
Gitataw ni Austria nga ang bag-o nilang mga sakop kinahanglang makat-on dayon sa pagpakig-uban sa Super Six.
“These players, they are welcome addition to the team kasi ma-strengthen yung bench namin. But yung chemistry ang kailangan naming ayusin because we all know how skilled these players are,” pasabot ni Austria.
Nagtuo si Austria nga ang pag-abot sa bag-o nilang mga sakop hilabi na si Romeo makapaus-os sa playing time sa iyang mga pambato.
“Yung mga players namin na naglalaro ng 35 minutes per game, most probably mababawasan yun, but that’s very good for the core kasi mapo-prolong yung career nila,” pasabot ni Austria.
“With these additions, malaking support ang ibibigay nila sa team at yung core will be given enough time to rest before going back dun sa closing minutes of the game.”
Giklaro ni Austria nga kinahanglan pa niyang pagiyahan ang bag-o niyang mga sakop sa hapsay nga pagpakig-uban sa ilang Super Six. ESL