PADAYON ang kainit sa host Brooklyn Nets ug ilang gipangbuntog ang Los Angeles Lakers, 115-110, aron inaton ang ilang sunodsunod nga kadaugan ngadto sa unom sa National Basketball Association (NBA) kagahapon.
Mao kini ang labing taas nga sunodsunod nga kadaugan sa Nets sulod sa dul-an sa upat ka mga tuig.
Ang kanhi sakop sa Lakers nga si D’Angelo Russell nagpakatap og 22 puntos unya natupngan niya ang iyang career-high nga 13 ka assists aron pangulohan ang balanseng ataki sa Nets.
“It’s a great feeling,” asoy ni Russell. “I personally have never been in that position at this level to win six in a row. Definitely not satisfied.”
Ang Nets, nga ningsaka sa 14-18 nga rekord, aduna pa’y laing lima ka mga magduduwa nga nakahimo og dobleng numero nga puntos.
Mibawi man tuod ang lider sa Lakers nga si LeBron James gikan sa mangil-ad nga duwa ug nagpakatap kini’g 36 puntos ug 13 rebounds apan wala gihapon kini magsilbe sa padayong init nga duwa sa Nets.
Ang Lakers, nga nangatagak sa 18-13 nga rekord, nakadawat sab og 23 puntos gikan ni Lonzo Ball ug 22 puntos gikan ni Kyle Kuzma.
Sa upat nila ka sunodsunod nga tahas sa balwarte sa ilang mga kontra, kausa pa lang nakatilaw og daog ang Lakers.
“We could’ve had a pretty good road trip but 1/3 is definitely not the way we would like to have it,” asoy ni James.
Ang Nets, nga katapusang nakarehistro og unom ka sunodsunod nga kadaugan niadto pang Marso 25, 2015, nakakuha sab og 19 puntos gikan ni Joe Harris, 18 puntos gikan ni Spencer Dinwiddie, ug 17 puntos gikan ni Rondae Hollis-Jefferson.
“It’s amazing, man,” matod ni Hollis-Jefferson. “Just to see the hard work we put in, all the resiliency we had, it’s amazing to be able to say we put together some wins.”
Gikan sa 13 puntos nga biya sa nahabiling 7:30 minutos, ang Lakers ning-rally pinangulohan sa duha ka sunodsunod nga three-point shots nila ni Kuzma ug Ball aron pahakan ang labaw sa Nets, 100-97.
Nagkumboya og balik ang Nets aron inaton na sab ang ilang labaw ngadto sa 113-107 sa nahabiling 22 ka mga segundos.
Wala na nakabangon ang Lakers gikan niini.
“That’s why this team has won six games in a row. They have a lot of different guys that can hurt you,” matod ni Lakers coach Luke Walton kabahin sa Nets.
Sa laing mga duwa, gipatapsingan sa Cleveland Cavaliers ang Indiana Pacers, 92-91, gipangdagit sa Atlanta Hawks ang Washington Wizards, 118-110, samtang gipangpukan sa Denver Nuggets ang Dallas Mavericks, 126-118. AP