NIMINOS ang mga mamaligyaay og pabuto sa Barangay Babag, giila nga “firecracker capital” sa dakbayan sa Lapu-Lapu base sa gamay nga gidaghanon sa mga nilukat og permit sa City Hall.
Gitug-an ni Lapu-Lapu City Mayor Paz Radaza nga kagahapong adlawa adunay 98 ka mga namaligya og pabuto ang milukat og business permit nga iyang napirmahan.
Ubos kini kon itandi sa miaging tuig nga miabot ngadto sa kapin sa 100 nga nanglukat.
“Ang atong manufacturing mihinay naman gud,” matod ni Radaza atol sa press conference kagahapon.
Si John Degamo, 21, kinsang pamilya nanag-iya og stall sa pabuto, nagkanayon nga nimahal ang ilang produkto tungod sa pagsaka sa presyo sa mga sagul nga gigamit sa paggama og pabuto, ilabi na ang pulbura lakip ug mga papel nga likiton nga magsilbing casing sa firecracker ug pyrotechnics.
Ang daplin sa dalan sa Barangay Canjulao lahos sa Barangay Babag maoy designated nga display area sa mga manindahay diin ang matag stall adunay distansiya nga six meters ang gilay-on.
Gidili ang pag-testing ug “no smoking” sa display area ug gikinahanglan nga adunay baril nga puno sa tubig ang matag stall nga isablig sa higayon nga adunay mosiga o mahitabong sunog sa dapit.
Samtang ang kapulisan ug kabomberohan nag-monitor sa maong dapit matag karon ug unya sa naasoyng display area.
Ang mga seller nagsugod og display niadtong Disyembre 16 ngadto na sa Disyembre 31.
Sa sayo pa, si Mayor Radaza nipagawas og kamanduan ngadto sa tanang barangay opisyal sa Lapu-Lapu nga motagana og usa ka dapit nga magsilbing ‘firecracker zone’.
Ang firecracker zone maoy gitugotan nga lugar alang niadtong mga konstituente nga magpabuto og firecrackers o pyrotechnics atol sa mga okasyon sa pagsaulog sa Pasko ug pagsugat sa Bag-ong Tuig.
Gikinahanglan nga ang maong area layo sa kabalayan aron nga malikay sa posibleng sunog gumikan sa pagtugpa sa pabuto ug ubang matang sa disgrasya. FVQ