DEPUTY chief sa Guihulngan City police station gipusil patay alas 10:25 sa buntag kagahapon, Disyembre 19, sulod sa usa ka kan-anan atbang lang sa ilang buhatan.
Si Police Sr. Inspector Porferio Gabuya Jr., 53, taga syudad sa Sugbo, kanhi hepe sa Talamban ug Parian police station sa wa pa siya gibalhin sa Guihulngan City, Negros Oriental kay nagkuwang og mga opisyal.
Duha ka wa mailhing armadong mga lalake nga sakay og motorsiklo ang niabot samtang nag-inom og kape si Gabuya sa usa ka tindahan ug dayong paarak sa dala niining armalite.
Nakaangkon og daghang mga samad sa lawas si Gabuya kinsa gidali pagdala sa labing duol nga tambalanan sa syudad, apan patay na siya pag-abot sa ospital.
NPA miangkon
Matod ni Chief Supt. Debold Sinas, director sa Police Regional Office 7, nga ang Special Partisan Unit sa New Peoples Army (NPA) ang niangkon nga sila ang nipatay kang Gabuya pinaagi sa gipakatap nga text messages.
Sa miaging semana nakadawat og intelligence information ang Guihulngan police station nga adunay mga armadong kalalakin-an nga nakasulod sa syudad, hinungdan nga milusad dayon sila og checkpoint kagahapon sa buntag.
Ang nadawat nga kasayuran sa kapulisan nag-ingon nga sakay sa usa ka van ang mga armado nga mangatake sa kapulisan ug militar.
Ilang na-intercept ang van nga gihulagway sa naghatag sa kasayuran, apan nakapakita ang mga sakay niini og dokumento nga sila di mga dautan ug wa silay nakuha nga mga armas.
Pasado alas 8 kagahapon sa buntag, Disyembre 19, gihunong ang check point alang na sa pagpangandam sa security briefing nga himuon sa mga personnel sa merkado publiko sa syudad.
Alas 10 sa buntag nihapit si Gabuya sa usa ka kan-anan aron mangape nga siya rang usa.
Pipila ka minuto ang nakalabay, gipaarakan na siya sa armalite sa duha ka mga lalake.
“Accordinglly iyang mga kauban niadto na sa ilang police assistance center sa market. Siya wala modiretso sa market. Niadto siya sa tindahan kay nag kape siya lang usa wala siyay ka body,” matod ni Sinas.
Manhunt
Tungod sa nahitabo, nimando dayon si Sinas sa paglusad og manhunt operation batok sa mga killer nga giingung paingun sa lungsod sa La Libertad, Negros Oriental.
Nipakatap na usab sila sa posibling mga hulagway sa duha ka mga gunman.
Nakig-alayon na usab ang Negros Oriental Provincial Police Office sa military intelligence group alang sa pag ila sa mga suspek.
Aduna nay nadawat ang PRO7 nga hulga gikan sa NPA nga molusad silag pagpamatay sa mga sakop sa PNP hinungdan nga adunay kamandoan ang Camp Crame sa tanang police office nga magbantay.
Kasagaran sa mga pulis sa Guihulngan kon mogawas sa police station gipasul-ob og bullet proof vest.
Wa matino kon si Gabuya nakasul-ob ba niini.
Apan kon siya girakrakan, dako ang posibilidad nga naigo siya sa ubang bahin sa lawas nga way proteksyon.
Ang hepe sa Negros Oriental Provincial Police Office nitug-an nga adunay nadawat nga hulga sa kinabuhi ang biktima human nga daghan kinig nasikop nga mga gidudahang mga rebelde sa syudad sa Guihulngan atol sa iyang pag lingkod isip deputy chief.
Daghan og award
Si Gabuya nahimong chief of police sa Talamban police station sa Cebu City Police Office niadtong Disyembre 2016.
Siya nahimong officer in charge sa Parian police station niadtong Marso 2018 human giparelibohan ang 43 mga personnel niini ug gihulipan sa taga Cebu City Mobile Force Company.
Kini human nga nadakpan sa entrapment operation sa Counter Intelligence Task Force ang usa ka Police Officer 3 nga nangilkil sa ilang dinakpan sa illegal nga drugas.
Nasulod sa Philippine Constabulary si Gabuya niadtong 1988 isip patrolman ug na promote sa pagka police inspector niadtong 2008 isip lateral entry ug gikatakda untang moretiro sa serbisyo sa 2021.
Niadtong Oktubre 24, 2018, adunay order gikan sa Police Regional Office 7 nga ibalhin siya sa Guihulngan City police station human nga nagkuwang og opisyal ang kapulisan sa probinsya sa Negros Oriental.
Matod ni Police Chief Insp. Jamie Santillan, deputy chief sa Personnel Division 7, nga daghang mga pasidungog ang naangkon ni Gabuya sa iyang pagka pulis.
Ang labing daghan niini mao ang Medalya ng Kasanayan, Medalya ng Papuri, Medalya ng Kagalingan ug Medalya ng Panliligalig sa Visayas.
Way record ang Personnel Division kon aduna bay kaso nga giatubang karon si Gabuya.
Sa dihang hepe pa siya sa Talamban police, usa sa iyang mga sakop gitumbok nga protector ni self confessed drug lord Kerwin Espinosa.
Matod ni Gabuya niadto nga gibutang butangan lang ang iyang sakop.
Si Gabuya usab ang usa sa mga saksi pabor kang anhing SPO1 Adonis Dumpit sa kaso sa iyang pagpatay kang Ronron Go niadtong 2004.
Si Gabuya nisaksi nga pinusilay ang nahitabo tali kang Dumpit ug Go.