USA ka tawo gibadlong sa iyang amigo kay sigi lang og inom. Matod pa sa iyang amigo, “Bay, kada gabii na man kang moinom.” Tubag pa sa maong tawo, “Dili oy. Moinom sab ko bisag adlawan pa. Pero di gyud ko moinom basta matug ko.”
Ang Department of Health (DOH) 7 nipahimangno sa publiko sa paghinay-hinay sa kaon ug inom sa mga ilimnong makahubog sa pagsaulog sa Pasko ug pagsugat sa Bag-ong Tuig. Di magpalabi atol sa noche buena ug media noche.
Di kalikayan nga sa pagsaulog sa Pasko ug sa Bag-ong Tuig naa gyud ang daghang mga pagkaon, sama sa lechon baboy ug manok. Naa pay lechon pork belly ug humba nga mo-ikid-ikid kon matandogan ang lamesa. Unya kon mabusog na, mangita dayon og ilimnon para pahilis. Sa sigi nag inom, mangitag sumsuman.
• • •
Si Dr. Shelbay Blanco, pangulo sa DOH 7 Health Emergency Management Staff (HEMS), niingon nga angay nga di magpalabi sa kaon ug inom sa mga ilimnong makahubog aron malikayan ang gitawag nga “Holiday Heart Syndrome.”
Ang mga sintomas niini naglakip sa abnormal nga pagpitik sa kasingkasing ug sa kalit nga paghubag sa kasingkasing. Ang gitumbok nga hinungdan mao ang pagpalabi sa kaon ug inom. Mahitabo kini bisan pa niadtong mga tawo nga maayo ang panglawas.
Matod pa ni Blanco, kadtong dunay mga cardiovascular diseases sama sa sakit sa kasingkasing angay nga di magpalabi sa pagkaon. Samtang kadtong dunay diabetes maglikay sa mga pagkaon nga tam-is.
• • •
Ang akong amigo nga taas og cholesterol niingon nako nga maglikay na siyag kaon sa tambok ug sa itlog. Ako siyang giingnan nga maayo na lang wa siya mapareho ni Erap nga nagbakang-bakang sa paglakaw.
Sumala pa sa mga pasiaw, gipangutana si Erap nganong nagbakng-bakang siya sa paglakaw. Mato pa ni Erap, “Gikan kong nagpa check-up sa doktor. Nitaas ang akong cholesterol ug palikayon kos itlog.”
Pero kaon lang kutob nga mabusog ka. Sama niadtong bata nga gipahimangnoan sa iyang inahan nga tiwason ang pagkaon sa iyang plato kay daghan kaayong mga bata nga way gikaon. Matod pas bata, “Kon ako ning hutdon, mabusog to sila?”