SUPERBALITA CEBU

Super Suroy: Camari Hills, kinatas-ang bukid sa Carcar

SA atong pagsaulog sa Pasko, wala ug tuo ang mga party nga atong gitambungan ug angayan lang nga magpasingot ta ug magsakripisyo aron makuhaan ang atong timbang.

Kon naa ka mahimutang sa dakbayan sa Carcar o kasikbit nga mga lugar niini, suwayi og tungas sa Camari Hills, ang kinatas-an nga bungtod sa siyudad.

Usa kini sa mga dapit suroyanan nga ikapasigarbo sa Carcar labi na kon maugmad og maayo.

Dili man ingon ana kalisod ang pagtungas padung sa ibabaw, panington gihapon ka. Apan kinahanglan lang nga mag-amping ka tungod kay dunay bahin nga batuon, dangugon kon mag-uwan ug bakiliron.

Apan sulit inig abot nimo sa taas kay presko, bugnaw ang hangin ug malantaw ang kasikbit nga mga bungtod sa silingang mga lungsod.

Ang Camari Hills nga nahimutang sa Barangay Calidngan, gibanabanang siyam ka kilometros ang gilay-on gikan sa sentro sa siyudad.

Nabantog kini nga pilgrim site ug dagsaanan sa mga tawo panahon sa Semana Santa labi na sa Biyernes Santo alang sa pagpahigayon og via crusis o Stations of the Cross.

Haom usab kini nga pamalandungan sa mga tawo labi na karon samtang nangandam ang mga tawo sa pagkatawo ni Hesukristo, makita usab sa dapit ang sakripisyo ug pag-antos sa Ginuo alang sa kaluwasan sa mga tawo gikan sa sala.

Sa Camari Hills, makita nimo ang higanteng estatuwa sa masulob-ong Birheng Maria nga nagsabak sa iyang namatay nga anak kun ang gitawag og Pieta, ug ang 20 ka tiil nga gitas-ong krus.

Si Albrando Pio, caretaker sa Camari Hills, niasoy ang Catholic Charismatic Renewal Movement (CCRM) ang nagsugod og via crusis sa bungtod niadtong 1984 panahon ni Padre Eric Pedrosa.

Estorya sa katiguwangan

Niadtong dekada 40, panahon sa gubat sa mga Hapon, gidagsaan sa mga treasure hunter ang Camari Hills gumikan sa gituohan nga dunay gitagoan nga mga bahandi sa dapit.

Matod ni Pio, dihang nagkawot ang mga treasure hunter dunay nakawtan nga haligi.

Saysay niini nga sigon sa karaang mga sugilanon sa ilang katigulangan dunay usa ka babaye nga usa lang ang suso ang magpakita sa mga tawo nga nagsakay sa kabayo nga bulawan.

Sugilon ni Pio nga duna usab nagka-interes nga magmina sa Camari Hills apan wa kini madayon tungod kay dunay tubig sa ilawom sa bungtod.

“Ingon ang among katigulangan nga kon gipadayon pa to, magkuha kuno og 250 ka mga bata diri sa amoa, mao tong nakuyawan sila,” asoy ni Pio.

Sa amihanan sa Camari Hills, makita ang kabukiran sa lungsod sa San Fernando; sa habagatan, ang mga bungtod sa lungsod sa Barili; kabukiran sa mga lungsod sa Pinamungajan ug Aloguinsan ang makita sa kasadpan ug ang tipik sa siyudad sa Carcar sa silangan.

Malantaw usab ang kasikbit nga isla sa lalawigan sa Bohol ug kon way mga gabon, makita ang Mt. Kanlaon sa probinsya sa Negros.

Sumala ni Pio dihang nibuto ang Mt. Kanlaon pipila ka tuig na ang nakalabay, namatikdan nila ang presensiya sa mga liki sa Camari Hills.

Sa ibabaw nga bahin sa bungtod, naa usab ang mga punoan sa gmelina, mahogany, turok banwa ug ubang mga klase.

Naa usab ang mga imahen sa Diyos nga Amahan ug Birhen sa Milagrosa sa isig ka kilid nga gipatukod panahon na ni Padre Virgilio Pedrano, kura paroko sa San Isidro Labrador Parish diin nasakop ang Camari Hills.

Mahimo mag-overnight sa Camari Hills diin klaro kaayo nga makita ang mga bituon, basta maayo lang ang panahon, pagdala lang og tent.

Karong bag-o ubos sa bag-ong kura paroko, Padre Benjamin Contapay, himuon usab sa maong bungtod ang Dawn Rosary sa matag unang Sabado sa buwan nga magsugod sa alas 4:00 sa kaadlawon gikan sa simbahan tungas sa ibabaw sa Camari Hills ug inig human isunod dayon ang misa.

Ang dapit paborito usab nga dagsaon sa mountain bikers.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph