Rockets mipapas sa record sa Cavs

MIPATUASIK og 35 puntos si James Harden sa dihang mikulit og NBA records ang Houston Rockets pinaagi sa pagpaulbo og 26 ka tres aron ilubong buhi ang Washington Wizards, 136-118, kagahapon.

Ang three-point shot ni Gary Clark sa 2:42 nga nahabilin sa duwa.

Nakatimaho nga mahulma ang record, ang mga fans mipalanog ug nagpanyagit og “Three!!!Three!!!Three!!!

Mikabat pa og upat ka pagsuway nga nasipyat apan sa katapusan si Michael Carter-Williams maoy miigon sa katapusang 31.1 segundos nga nakapabuak sa record ug didto midahunog ang abiba sa sulod sa Arena.

Ang Cleveland Cavaliers maoy naghupot unta sa record nga 25 ka tres batok sa Atlanta Hawks niadtong Marso 3, 2017.

Unom ka tres ang natampo ni Harden, lima kang Chris Paul ug tagup-at sila si Eric Gordon ug Gerald Green sa maong kagabhion nga ang Houston mitali og 55 ka itsa sa three-point area.

Ang Rockets komportabli nga naghupot sa bintaha gikan sa sinugdanan hangtod sa katapusang nga gani nakaposte kini og 111-94 nga labaw sa nuebe minutos sa fourth quarter.

Ang bag-ong sakop sa Rockets nga si Trevor Ariza, sa iyang ikaduhang duwa ubos sa Houston, mikutlo og 15 puntos.

Sa laing duwa, nabuntog sa Detroit Pistons ang Minnesota Timberwolves, 129-123, sa overtime.

Nagmangtas sa ilang opensa sila si Blake Griffin nga may 34 puntos ug Reggie Bullock nga midugang og career-high nga 33 puntos.

Nabiyaan og 12 puntos ang Pistons apan napapas ang labaw sa Wolves human nagkumboya sila Griffin ug Bullock nga giayudahan usab nila ni Reggie Jackson (24 puntos) ug Andre Drummond nga may 16 puntos ug 16 ka rebounds alang sa Detroit. JBM

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph