PAG-ULAN nga nasinati sukad Miyerkules sa gabii o ang uban kagahapon sa kaadlawon sa Huwebes, Disyembre 20, tungod sa duha ka mga weather disturbance, low pressure area (LPA) ug tail end of the cold front.
Ang uwan maoy nakaingon sa pagbaha sa pipila ka bahin sa Metro Cebu.
Matod ni Engr. Alfredo Quiblat, officer-in-charge (OIC) Philippine Atmospheric Geophysical Astronomical Services Administration (Pagasa) Visayas, nga ang LPA nga nakasud sa nasud niadtong Miyerkules sa buntag, Disyembre 19, anaa sa may Hinatuan, Surigao Del Sur, kagahapon sa alas 3 sa hapon.
Gipakusgan kini sa tail end of the cold front hinungdan sa halos wa’y hunong nga hinay ngadto sa kasarangan ug usahay kusog nga pag-ulan, kun ang prolonged rain.
Gidugangan pa kini sa hangin nga amihan hinungdan nga apektado ang tibuok Kabisay-an ug Mindanao.
Baha
Usa ang dakbayan sa Mandaue ang nakasinati sa ‘prolonged rain’ hinungdan nga niabot og taga hawak ang baha sa national highway sa may La Tondeña ug Innodata, sa Barangay Subangdaku alas 12:40 kagahapon sa udto.
Alas 2 kagahapon sa hapon na nihinay og hubas ang baha, hinungdan nga pipila sa mga sakyanan nibalik sa ilang agi.
Aduna gyuy uban ang nisungasong, hinungdan nga adunay napagngan sa ilang mga sakyanan, tunga-tunga sa baha.
Gani ang baha sa Subangdaku, niabot pa sa sumpay nga dan niini sa MJ Cuenco, habig na sa brgy. Mabolo, Syudad sa Sugbo.
Ang maong sitwasyon, matod ni Jay Basubas, officer-in-charge sa Mandaue City Risk Reduction and Management Office, nga nasinati usab sa may dan dapit sa San Miguel, sa Brgy. Tipolo.
Nakasinati usab og pagbaha, above knee level sa dan AS Fortuna sa may Rolling Hills.
Warning
Sa alas 2 sa hapon usab, gitug-an ni Basubas nga ni-alarm ang ilang system nga gimuntar sa may Cambugao bridge, nagpasabot nga ang tubig sapa sa maong lugar niabot na sa warning level.
Ang Cambugao bridge nahimutang sa may 6.5 ektaryang relocation site sa Brgy. Paknaan, sumpay sa Butuanon River.
Hinungdan nga gipabakwit na ang mga tawo nga namuyo sa lugar kagahapon sa hapon.
Lakip sa gibahaan ang dapit sa may Guizo Elem. School, tungod usab sa pagsaka sa tubig sa Mahiga Creek.
Dugang nga gitug-an, ni Quiblat nga bisan kon gamay ang kahigayunan nga mahimo nga bagyo ang LPA, ang maong pag-ulan posibleng masinati hangtud na sa weekend tungod sa laing cloud cluster sa gawas sa Philippine Area of Responsibility.
Ang maong cloud cluster gilantawan nga posibleng mahimong laing LPA nga magda gihapon og uwan.
Alas 9 kagahapon sa buntag, Disyembre 20, nipagawas na og yellow warning ang Pagasa sa tibuok Kabisay-an.
Nagpasabot kini nga kuyaw sa mga pagbaha ug pagdahili sa yuta.
Ni-isyu usab ang Pagasa og gail warning sa Eastern ug Northern Seaboard sa Samar.
Apan di usab angay nga mokompyansa ang gagmay nga sakyanang pandagat sa paglawig, sa ubang kadagatan sa Visayas ug Mindanao.
Kagahapon sa alas 2 sa hapon nitala na ang Pagasa og 30 mm rainfall measurement.
Gipaabot nga karong Lunes pa makasinati og arang-arang nga panahon.
Tungod sa wala’y hunong nga pag-ulan sukad pa kagahapon sa kaadlawon, giisa sa Provincial Disaster Risk Reduction and Management Office (PDRRMO) ang blue alert status sa tibuok lalawigan.
Buot pasabot, gipa-alerto na ang tanang local disaster risk reduction units ug local responders alang sa monitoring sa tibuok probinsiya.
Dunay giisa nga orange warning level sa nasinating pag-ulan, busa gihimug-atan sa PDRRMO ang kamahinungdanon sa pagma-igmat ug pagbantay sa palibot.
“Gi-activate na namo ang nagkadaiyang grupo, ang mga disaster officers. Naa na’y contact nila, naa na ta’y mga nanawag (nag-monitor) especially the northern part kay kusog na ang ulan didto sukad pa ganina. Duna baya tay mga lugar diha nga bahaanan diha dapit, sa Medellin... Sa south dapita, dag-om pa lang, taligsik,” padayag sa tigpamaba sa PDRRMO nga si Julius Regner.
Bisan sa pagpangandam alang sa umaabot nga Pasko, gitumbok sa PDRRMO nga angay di malipat ang mga Sugbuanon sa pagbantay usab sa ilang palibot, ilabi na nga nasinati ang pag-ulan sa halos tanang bahin sa probinsiya.