GILUSAD kaganihang buntag sa dakbayan sa Mandaue ang "Pasaherong Pulis" nga program diin mismo si Mandaue City Police Office director Julian Entoma ang nangulo sa kalihukan.
Kini dungan na usab sa iyang pagsusi sa mga terminal.
Bisan dagsa ang mga manguliay sa amihanang bahin sa Sugbo, gihulagway sa supervisor sa Cebu North Bus Terminal (CNBT) nga si Nemesio Lumapac nga menus og 50 porsyento karon ikumpara sa niaging tuig.
Aron sa pagpasidaan sa mga mamauliay sa ilang tagsa ka lungsod sa amihanan nga bahin sa Sugbo, nangunay ang pangu sa kapulisan sa dakbayan sa Mandaue sa pagsusi sa CNBT, kalabot sa seguridad sa mga pasahero.
Nagpasidaan usab si Entoma sa mga manakayay alang sa mas luwas nga pagpauli ug pagbakasyon.
Gawas sa iyang pagpamulong sulod sa mga bus ug pagpahimangno sa mga bus drivers diha sa pagmaneho, niapu-apod usab siya uban ang mga sakop sa Police Relations Office og mga flyers alang sa safety tips malikay nagkadaiyang krimen ug ang madisgrasya tungod sa paggamit og pabuto.
Apan bisan pa man nga mas gamay ang mga pasahero karon, giandaman gihapon sa mga awtoridad nga posibleng ugma, sa Dominggo o sa bisperas sa pasko, ang mas mudagsa pa ang mga pasahero, hinungdan nga nihangyo si Entoma og itagan nga dugang sundalo diha sa CNBT, nga magda usab og k9 units aron sa pagsiguro nga wa gayud kontrabando nga makasud o mapalusot.
Gituyo usab ni Entoma ang terminal sa mga pampasaheruang jeepney, ug nisakay gyud diha sa jeep, atol sa ilang paglusad usab sa "Pasaherong Pulis" nga programa.
Usa kini ka paagi nga mas masumpo ang mahitabong nagkadaiyang klase sa kawat diha sa mga PUJ, pinaagi sa random nga pagsakay sa mga police nga naka-uniform.
Himuon kini sa kada police station pinaagi sa buddy-buddy system ug pasundan usab kini og mga sakop sa tactical motor riding unit aron di usab mabutang sa alanganin ang kaluwasan sa mga pulis ug mga pasahero.