SOBRA sa katunga sa normal nga rainfall measurement karong Disyembre ang natala nunot sa kusog nga pag-ulan nga milungtad og 15 ka oras niadtong Huwebes, Disyembre 20.
Nakatala ang Pagasa-Mactan og 85 millimeters (mm) kon 425,000 ka mga drum sa tubig matag kilometro kwadrado gikan sa pag-ulan hinungdan nga grabe nga baha ang nasinati sa pipila ka bahin sa dakbayan sa Mandaue ug sa Sugbo.
Matud ni Engineer Alfredo Quiblat Jr., ang officer-in-charge sa Pagasa-Visayas, nga ang labing daghang natala nga uwan sa alas 11 sa buntag hangtud sa ala 1:30 sa hapon diin niabot gyud kini og 60 mm,
Maayo nalang nga sa pagkagabii sa susamang adlaw nahilis ra ang low pressure area (LPA) nga maoy nagdala sa daghang ulan ug nihinay ang epekto sa tail end of the cold front, dugang ni Quiblat.
Hinungdan usab nga sukad kagabii, hangtud ning' adlawa, Disyembre 21, maayo na panahon ang nasinati.
Apan alas 3 sa kaadlawon, Biyernes, Disyembre 21, laing LPA ang nakasud sa nasud, nga maoy gipanlantawan nga magdala na usab og madag-umon ug katag nga pag-ulan.
Ugma Sabado, Disyembre 22, tungod nihinay ang epekto sa Tail end of the cold front, posibleng dili masinati ang susama nga gikusgon sa hangin ug arang-arang nga panahon ang masinati sa bisperas ug atol na sa pasko.
Apan laing cloud cluster ang gi-monitor na usab sa Pagasa gawas sa Philippine Area of Responsibility nga posibleng mahimo nga LPA, ug mahimo nga katapusan nga bagyo ning tuig 2018 nga mosulod sunod semana.
Samtang karong Sabado masinati ang pinakataas nga gabii ug pinakamubo nga adlawa tungod sa Summer Solstice, usa sa importante nga epekto niini, matud ni Quiblat, nga sa bulan sa Enero hangtud sa Marso sunod tuig, mas menus ang makasud nga bagyo sa nasud.