ARON mas mapabati pa ang tiunay nga gugma ug pakigdait ning panahon sa kapaskohan, ang high school batch 2003 sa Saint Peter's College of Toril (SPCT) mipahigayon og usa ka community outreach program ning bag-o lang.
Inay mopahigayon sila og Christmas Party, mihimo nalang sila og programa sa tumong nga ilang mapabati ang hatud sa pasko diha sa kinabuhi.
Agi'g pasalamat sa grasya nga ilang nadawat ug agi'g tulay aron magkatigom ang ilang batch, nanghatag sila og mga food packs, hygiene kits, bugas ug mga dulaan sa kabataang lumad didto sa Sitio Sualon, Barangay Tamugan, Davao City.
“Usa ni sa among mga pamaagi nga mahatud namo ang diwa sa pasko sa community, ug dako among pasalamat sa among mga ka-batch nga bisan wala ang uban, apan naa ilang suporta aron mahatud namo ang among pamasko,” ingon ni Irahlie Yap, ang officer-in-charge sa SPCT high school batch 2003.
Sa sunod tuig, nanghinaut ang grupo nga mapadako pa nila ang ilang programa pinaagi sa panagtapok sa ilang mga ka batch aron maplanohan ang mosunod nilang outreach program sa komunidad panahon sa Pasko.