PIPILA ka mga local government unit (LGU) sa Davao del Sur ang nagsaulog na sa Pasko pinaagi sa Christmas party adlaw’ng Biyernes, Disyembre 21.
Una nang nagsaulog ang munisipyo sa Hagonoy sa ilang Christmas party niadtong Huwebes sa gabii.
Ang city hall sa dakbayan nagsaulog sab sa ilang party Biyernes sa buntag.
Si Mayor Joseph Peñas nagpaabot sa iyang mensahe sa tanang kawani nga mahinungdanong saulogon sa matag pamilya ang Pasko nga puno sa hudyaka ug ipabati sa ilang mga anak.
Giawhag sab ni Peñas ang mga kawani nga mangandam sa pagsulod sa tuig 2019 ug ihatag sa katawhan ang mas nindot nga pag-serbisyo isip kawani sa gobyerno.
Sa lungsod sa Magsaysay, si Mayor Arthur Davin nagbutyag nga angayan sab likayan ang paggamit og mga pabuto aron luwas ang matag usa sa ilang selebrasyon.
Gihagit ni Davin ang mga kawani ug mga department heads nga mas magkugi sa ilang trabaho ug dungang sagubangon ang mga hagit sa taliabot nga Bag-ong Tuig 2019.
Daghan sa mga regular nga kawani sa ubang munisipyo ang nagmaya sanglit gawas sa 13-month pay, nakadawat sab sila og cash gift ug aduna pay productivity bonus. (Orlando B. Dinoy)