Aibon C. Singco
Cebu City
Pasko usa ka anib sa panahon
Nga puno sa nagkadaiyang emosyon
Mora og bugnaw nga fruit salad
Nga sa kan-anan gidalit gihalad.
Pasko oras sa pagmaya ug hudyaka
Labi na gayud sa daghang mga bata.
Maglukso-lukso ug maninggit sila
Tungod sa bag-ong dulaan ug sinina.
Kalipay pod kini sa anaa sa kompaniya
Kay mga bonus moabot moarangkada.
Segurado man nga moburot ang pitaka
Kay ang deduction sa loan ibale-wa na.
Para sa mga tawong may gasa sa kabuotan
Kadtong dunay bulawanong balatian
Pasko maoy dakong kahigayunan
Pagpaambit sa mga grasyang nakamtan.
Dili matukib nga kalipay mabatyagan
Sa manggiluy-on ug buotang mga dughan.
Pero sa mga tihik nga ninong ug ninang
Ay, pastilan, ang Pasko pagkapangpang!
Dili gayud intawon sila mokuot
Sa ilang bulsa nga subra sa kahugot!
Lisod, grabe sila ka pangitaunon
Mora silag dunay mutya sa tagulilong.
Unsaon man sab god ang mga kinugos ta
Mahinumdom lang pag-amen kon Pasko na.
Kahibalo kaayo kon asa kita pangitaa,
Tawgon dayon ta nilag Papa ug Mama.
Unya kon ang mga bulang ‘Ber’ layo pa,
Ambot kon kita nailhan ba nila?
O, di ba ang Pasko makalingaw?
Daghang nindot mga butang mahanduraw.
Mga higala ug mga kaaway magtinagdanay
Kon mag-abot may beso-beso may gaksanay.
Mga lalis kalimtan ug kayugot isalikway.
Sa Pasko hunungon usa nato ang away
Kay adlaw man kini sa pagbinatiay!