NAG-UMOL og special investigation task group (SITG) ang Negros Oriental Provincial Police Office aron mosusi sa kamatayon ni Guihulngan Deputy Police Chief Sr. Insp. Porferio Gabuya, Jr.
Si Gabuya namatay human rakraki sa duha ka wa mailhing mga lalake nga sakay sa motorsiklo sa Barangay Poblacion, syudad sa Guihulngan niadtong Miyerkules sa buntag, Disyembre 19.
Unang gipasanginlan ang New People’s Army (NPA), apan ang grupo nanghimakak niini.
Matod ni Supt. Christopher Navida, hepe sa Guihulngan police station, nga ang mangulo sa SITG mao ang Provincial Investigation and Detective Management Branch inabagan sa Criminal Investigation and Detection Group 7 lakip na ang Guihulngan police.
Anggulo
Tulo ka mga anggulo ang gisubay sa kapulisan sa Negros Oriental.
Una, may labot sa illegal nga drugas kay higpit ang kampanya sa kapulisan sa Guihulngan batok sa illegal nga drugas.
Wa usab nila wad-a ang posibilidad nga adunay kalambigitan ang liquidation squad sa NPA tungod sa giingong ningkatao nga mensahe sa cellphone nga molusad og pagpang harass sa mga pulis ug militar sa Negros Oriental.
Katapusang susihon mao ang grupo sa tigpayuhot sa mga loose firearms.
Mahimong sakto ang pamahayag sa NPA, matod ni Navida, nga di sila ang responsabli sa kamatayon ni Gabuya nga mao ang subayon ug tun-an sa mga imbestigador.
Una nang mihimakak ang kampo sa NPA sa Negros island nga dili ilang grupo ang nagpatay kang Gabuya sanglit wala silay rason nga ila kining buhaton.
“Isa sa mga tiningna natin dyan is yung pagiging operative ni Captain Gabuya in which nag lead din sya rito ng mga operation for RA 9165 sa illegal drugs to include yung RA 10591 sa mga illegal possession of firearms. So, marami tayong anggulo na tinitingnan sa ngayon,” matod ni Navida.
Adunay tulo ka saksi ang Guihulngan PNP, nga naglakip sa usa ka bata ug babaye nga customer sa tindahan diin gipatay ang police official.
Lakip nga naa sa kustodiya sa PNP ang kopya sa duha ka CCTV camera gikan sa mga silingan eatablisemento apan ang problema dili maklaro ang panagway niini tungod sa gitabon sa ilang nawong.
Hugot usab nga gihimakak ni Navida nga gihimong labayanan sa mga badlongong police ang Guihulngan police station.
Kini nigawas ang report nga ang 43 ka mga pulis sa syudad sa Talisay ug ubang mga personnel sa Parian police station sa syudad sa Sugbo ang naa na karon sa syudad sa Guihulngan.
Matod ni Navida nga usa siya sa mga nabalhin gikan sa syudad sa Sugbo ug ning bag-o lang gikan siya sa probinsya sa Bohol ug normal lamang kini sa trabaho sa police.
Wa usab kini magpasabot nga ang Guihulngan na ang labayanan sa mga badlungong pulis gikan sa ilang mother unit.
Iyang giangkon nga adunay mga personnel gikan sa Negros Oriental ang naa na karon sa probinsya sa Sugbo samtang ang ubang personnel sa Bohol anaa usab sa Negros Oriental.
Gianugnan
Kanhi mga silingan ni Gabuya sa Barangay Tejero, dakbayan sa Sugbo gianugnan ug nagbangutan sa iyang kamatayon.
Si Gabuya residente sa una sa Barangay Villagonzalo II, Tejero siyudad sa Sugbo tungod kay naminyo, apan mibalhin kini ug ang pamilya niini human nakapalit og balay sa Talisay.
Bisan pa og wala na nagpuyo si Gabuya sa Barangay Tejero, ang iyang mga suod nga higala ug silingan niingon nga siya buotan ug maayong tawo.
Matod ni Jolly Gabahug, 66, wa siya makatuo sa nahitabo ni Gabuya.
“Buotan kaayo to si Sir Gabuya. Wa ko kadungog nga naa siya’y kaaway ug daotan nga gibuhat. Respetado kaayo to siya diri sa among lugar kay buotan kaayo to siya ug motabang to namo diri kon naa mi problema,” subay ni Cabahug.
Bisan si Lily Amorin di makatuo nga dunay mopatay kang Gabuya. “Maayo kaayo nga taw si, Sir. Matinabangon gyud kaayo siya. Ambot nganong nahitabo to niya. Basin nasuyaan siya,” butyag ni Amorin.
Matod niya nga masumbongan si Gabuya og problema.
“Naguol ug naluoy gyud ko sa nahitabo niya kay wala gyud to siyay bad record. Buotan kaayo. Makasulti mi niya sa among mga problema ug tabangan pud mi niya.”
Matod sa ubang mga residente nga magduawan gihapon sa ilang dapit si Gabuya. AYB, Kiziah Marie T. Suello & Jolissa Mae Taboada, USJR-Intern