BISAN pa man sa paninguha sa mga kongresista, wa gyud maapas ang pag-uyon sa budget alang sa 2019 ug reenacted budget na lang magamit sud sa first quarter sa Bag-ong Tuig.
Buot ipasabot, di magamit ang mga budget insertion sa pipila ka mga kongresista nga gitawag karon og “parked pork.”
Sama sa pork barrel nga giprotestahan sa katawhang Pilipino kaniadtong panahon ni Presidente Aquino, gituohan nga kining inserted budget tinubdan unya sa kurapsyon. Nakahibawo na man kita sa labing menos nga 30% nga SOP gikan sa budget sa mga proyekto.
Kahinumduman, tungod sa expose ni Sen. Ping Lacson, nahimong dakong isyu kining paggahin og dakong pundo alang sa mga proyekto sa mga kongresista diha sa ilang mga distrito.
Nabonggo na hinuon nga moabot og mga 99 ka mga kongresista nga dunay mas dakong inserted budget kay sa P1.9 bilyones ni House Speaker Gloria Macapagal-Arroyo.
Nisaka ang akong kilay niini kay giingong nakapabor ang usa ka kongresista dinhi sa Central Visayas nga taga Bohol, si Kong. Arthur Yap nga nilansar karon sa pagka gobernador sa maong lalawigan nanghimakak man nga duna siyay namaniobra nga inserted budget.
Di ko makatuo nga kining maong kongresista nga mas gamhanan pa kang Kong. Gwen Garcia (lalim bay siya ang niilis kang Gwen isip deputy speaker) ug sakop pa gyud sa House Committee on Appropriations.
Sa record ni Kong Yap nga nalambigit kaniadto sa fertilizer scam ug sa rice smuggling, di ko makatuo nga wala siyay mga proyekto nga giapil sa inserted budget sa 2019.
Mao diay nga wala mabalaka sa budget insertion issue ang kampo ni kanhi Cabinet Secretary Jun Evasco kay ilang pangagpas nga di makagamit si Kong. Yap sa gituohang SOP gikan sa inserted budget alang sa kampanya.
Balaudnon
Nakakuha kitag kopya sa balaudnon ni Kong. Raul del Mar kabahin sa mga habal-habal ug Angkas nga gisang-at sa miaging tuig. Pending kini karon sa Committee on Transportation.
Wa kita makakitag kopya sa giingon ni Konsehal Jun Alcover nga iyang nasang-at nga balaudnon kabahin sa mga habal-habal dihang kongresista pa siya.
Namasangil man gud kini si Kong. Alcover kang Mayor Tomas Osmeña nga namulitika sa gipakitang suporta niini sa mga habal-habal. Nagkanayon si Kong. Alcover nga siya dunay balaodnon apan wa kini ma-aksyoni sa Kongreso mao nga diha na lang niya giduso sa Konseho sa Syudad sa Sugbo.
Apan sa miaging tuig pa man kita nakabalita nga nidupa na si Mayor Osmeña sa Angkas nga layo pa ang piliay. Karon, atong nakit-an kining balaod-non nga gisang-at ni Kong. Del Mar.
Si Kong. Raul naghilom lang apan si Kong. Alcover grabi ang pagpangugat sa iyang nabuhat ug namasangil dayon nga ang kaatbang nga kampo maoy namulitika. Mao ba? Hmmm.
@anol_cebu sa Twitter