KON mag scooter ko, di ko mobusina og mga siklista. Di gani nako ingnon nga padaplin kay mouna ko. Mangita ra kog paagi unsaon nako pag-overtake nga di siya mahasol sa akong buhaton. Kon road user ko, hasta usab ang mga siklista.
Mobusina lang ko kon maggara-gara sa karsada ang usa ka siklista. Kana bang magpataka pagpadagan kay gusto lang mopakita sa iyang abilidad. Ang karsada man gud di dapit sa mga extreme sport kay naa kini dapit nga alang niini.
Usahay mapungot ko nga dunay mga tag-iya og sakyanan, four o two-wheel, nga maorag maoy tag-iya sa karsada, magsige og busina aron ang uban mopadaplin kay kuno nagdali. Di ra ba. Bastos lang ang uban. Ang angay nga magbuhat niini kadto rang nag-emergency, di niadtong igo rang nagdali kay dunay tambungan o apason. Kinsa man gud ang wa magdali? Kana kay nagsakyanan, nagdali. Busa, bisan kinsa, basta di emergency, di maghawodhawod sa dan kay patas ra tang tanan.
Makaguol, kay sa 100 ka drivers sa dan, naay usa nga patilyahon og utok.
Mibug-at
“Midaku lagi ka.” Mao ni ang sagad sulti sa akong mga higala nga ikahibalag nako nga wa nako igkita for months or years. Nagtuo man gud ang kadaghanan nga ang pagbiseklita makapadaut. Kon magbiseklita ka lang og once a week, unya mohabhab ka og unom ka adlaw, modaut ka kaha?
Sa mga pagtuon, kon di ka makapasingot og tulo ka adlaw, ang imong nakuha sa exercise matibhangan o mawagtang. Mao gani nga mas advisable nga mag-ehersisyo three times a week. Mahimo sab nga kada adlaw for thirty minutes. Dunay mga pagtuon nga nagpakita nga mas maayo ang epekto niini kay sa three times a week, usa ka oras o labaw pa. Mas maayo ang imong ma gain.
‘Kamote’ driver
Usa ka higayon niana, nakatupad kog senior citizen nga nag-drive sa iyang sports utility vehicle (SUV) samtang stop. Iyang sulti mao nga “kani bang mga nagmotor, sagad no nagtuo silang puthaw ang ilang lawas.”
Sakto siya kay kadaghanan sa mga nagmotorsiklo kusog kaayong makapadagan, maorag way kamatayon.
Usa niana ka Dominggo, samtang nagpadung ko sa simbahan sa Barangay Mabolo, usa ka Toyota Avanza ang kusog kaayong nagpadagan. Mihatag ko og lugar. Samtang nagsunod ko, nagsige og change og lane. Mosulod sa wala, dayon sa tuo.
Sa among pag-abot sa atubangan sa Country Club, mao gihapon ni ang iyang gibuhat. Sa kalit lang, dunay nihadyong sa akong walang kilid. Usa ka motor samtang sa unahan, ang Avanza nikalit lang sa pagsulod sa left lane.
Sa kakusog sa dagan, wa na mokupot ang brake sa motor, nabangga siya sa Avanza nga ikis ikis ang dagan. Natumba ang nagmotorsiklo ug nisiyagit sa kasakit. Di diay siya puthaw.