GIBANA-BANA nga moabot sa 130 ka mga tawo ang magtakus sa lumba og dagan sa Rizal55 Ultramarathon 4th Edition nga magsugod sa Tagum City Hall sa Disyembre 29 ug matapos sa People's Park sa Davao City sa Disyembre 30.
Kini maoy gibutyag ngadto saSunStar Davao sa Manila-based organizer nga si Roel Ambano-Ano sa BBGRun Events nga gigamhan sa Davao Ultrarunners Club.
Matud niya nga mga ultrarunners gikan Bukidnon, Cagayan de Oro City, General Santos City, Bansalan, Koronadal City, Tagum City, Panabo City, Davao City, Manila, Butuan City, Digos City, Mati City ug Lupon sa Davao Oriental, ug daghan pa.
Mga gilaumang mopakita og gilas sa mga lalaki nga dibisyon mao sila si Percy Montialbucio sa Davao City, Jay Bustamante sa Team Titans Davao ug Michael Lopez sa PRCpanabo ug Richard Cabreros sa K9 Literunner Gensan samtang sila si Hedda Riola sa Team Amihan, Manyln Mamugay sa Mati City ug Marissa Magallanes Team BGR Davao maoy angay nga atngan sa dibisyon sa mga babaye.
“Tapos na ang registration last week pa, hulat nalang mi sa Rizal Day,” matud ni Ano.
Mga premyo naghuwat sa unang tulo ka mga mananaug pinaagi sa Amihan Gear ug Itimestudio.
Tin-aw niya, “All finishers with the cut off time of 10 hours will receive trophy, medal and finisher shirt.”