DUHA sa upat ka mga kaso nga gipasaka batok sa New City Commercial Center (NCCC) mall owners ug Survey Sampling International (SSI) dili “liable” kun di makasohan ang mga nahisgutan subay sa City Prosecutor’s Office diin nalab-as kini sa unang tuig sumad karong adlawa sa pagkasunog sa NCCC Mall, sa Maa Davao City.
Si City Prosecutor Nestor Ledesma nagbutay nga ang upat ka mga kaso nga gipasang-at sa Inter Agency Anti-Arson Task Force niadtong Agosto 30 batok sa mga responsable sa December 23, 2017 NCCC Mall fire nga nikalas og 38 ka mga kinabuhi, duha niini dili liable ang NCCC ug SSI.
“Ang surviving heirs of the 38 deceased persons nag-submit sila og affidavits of desistance. Ilahang gibutang didto nga dili na sila interesado nga ipadayon ang kaso unya ilaha ng gusto nga i-withdraw ang kaso against more or less 18 respondents sa reckless imprudence,” sulti ni Ledesma nga nahinabi sa dxDC RMN Davao.
Giingon ni Ledesma nga duha sa upat ka mga kaso ang ilahang naduso, ang violation sa Republic Act 9514 o Revised Fire Code of the Philippines of 2008 ug falsification of public documents.
“Walay nakita namo nga liability sa kadtong board of directors sa NCCC, board of directors sa SSI ug kadtong board of directors sa Rockport so bale ang ma-file an unta og kasong reckless imprudence kadtong si Engr. Wilson Velasquez who was the project in charge gayud sa NCCC mall nga renovation,” matud ni Ledesma.
Giingon sab niini nga kinahanglan sa kasong kriminal nga itudlo gayod kung kinsa ang partikular nga mihimo sa salaud.
“Sa criminal cases man gud kinahanglang imohang i-pinpoint kung unsa gayud tong particular act or participation sa usa ka respondent bag-o nimo siya ma-file-lan og kaso. Dili nimo pwede nga ipa-priso tong presidente o kanang mga corporate secretary or treasurer kay wala man sila'y gibuhat nga krimen o sala. So, there is no participation or act on the part of the board of officers, ang liable lang gyod kay siya man ang in-charge sa renovation of the NCCC mall building bale na-dismissed pod ang kaso sa iyaha because of the affidavit of desistance,” pagpasabot ni Ledesma.
Segun sa prosekyutor nga “dismissed” pod ang kasong reckless imprudence resulting to multiple physical injuries.
“Walay ebidensiya so na-dismissed pod siya,” sumala ni Ledesma.
Gibutyag sab niini nga aduna sila'y memorandum of agreement (MOA) sa Office of the Ombudsman ug nagsumite na sila sa ilang rekomendasyon kalabot sa kasong may kalapasan sa Republic Act 3019 or the Anti-Graft and Corrupt Practices Act.
“Atong gi-forward sa ilaha atoang recommendation kay sila ang mo-final ana, sila mag-determine kung ilahang aprubahan o i-reject ang atoang recommendation. Dili namo ma-disclosed kung unsa ang among gi-recommend,” segun ni Ledesma.
Kahinumduman nga gipasalig sa City Prosecutor’s Office nga tapuson nila ang ilahang preliminary investigation una pa man ang usa ka tuig nga anibersaryo sa NCCC Mall fire incident. (Uban si Aimee Guinita/dxDC RMN Davao)