MINNEAPOLIS – Mokita ang umaabot nga away nila ni 8-division boxing world champion Manny “Pac-Man” Pacquiao ug Adrien “The Problem” Broner karong Enero 19 sa MGM Grand sa Las Vegas, USA.
Mao kini ang gipabuhagay nga pagtuo ni ex-PBA Rey Yncierto dihang nahinabi sa Superbalita Cebu pinaagi sa online chat.
“Kung nagtuo sila nga langawon ning awaya nasayop sila tungod kay si Broner pareho ni sila kadangog ni Floyd “Money” Mayweather Jr. nga maayo kaayo modepensa ug may talagsaong abilidad sa pamoksing,” asoy sa kanhi Pepsi Cola gunner, kinsa nagbasi na sa California, USA.
Midugang si Yncierto nga dili ni scripted nga away bisan anaa si Mayweather nga nagpaabot ni Pacquiao (60-7-2, 39KO) kon magmadaugon kini.
Alang kang Yncierto, si Broner (33-3-1, 24KO) usa ka dakong babag sa nakaplanong panagharong og balik nila ni Pacquiao ug Mayweather.
“Nasayod ta nga nagsingabot ang eleksyon busa ang mga politiko sa nagkadaiyang dapit sa Pilipinas apil na sa Cebu mag pay-per-view (PPV) sa away ni Pacquiao sa nagkadaiyang gymnasium ug posible sa Cebu City naay PPV sa BOPK ug Barug Team Rama,” segunda ni Yncierto.
Si Yncierto nagdako nga kanunay mosaksi og boxing events kaniadto sa Barangay Quiot, Cebu City gumikan sa impluwensya sa iyang amahan nga si Totem Yncierto, kinsa mahiligon sab ning maong natad sa paugnat sa kusog.
Sa panahom ni Yncierto, kinsa kanhi basketball varsity sa Sugbo, modaog ang Pambansang Kamao ng Pilipinas pinaagi sa unanimous decision. (Daniel Quindao Guden, US Correspondent)