PIPILA ka mga adlaw ang nakalabay, ang trapiko sa mga dakbayan sa Lapu-Lapu, Mandaue ug Sugbo migrabe. Si Cebu City Transportation Office (CCTO) operations head Francisco Ouano niingon nga labing minos 40,000 ka mga sakyanan ang naa sa kadalanan.
Sakto man o di, o bisan unsa man nga formula ang iyang gigamit, sakto man o di, usa ra ang klaro- naghinobra ang mga sakyanan sa kadalanan sa kapasidad sa mga karsada. Gamay ra gani tingali nang 40,000 ka mga sakyanan.
Daghan usab sa mga netizen ang magsige og yawyaw sa social media kalabot sa suliran sa trapiko nga mugna sa samang rason, kadaghan sa mga sakyanan sa kadalanan. Bisan unsa pay buhaton sa local government units (LGU), di masulbad ang trapiko kon pasagdan nga managhanan ang mga sakyanan sa kadalanan.
Ang sulbad ra ani, paminusan.
Wa makakita ang kadaghanan nga wa sa mga LGU ang suliran, kon di sa nasudnong kagamhanan nga way gihimong mga lakang. Hinay ang pagpatuman sa mass transportation system. Sige lang ang estorya, apan laway ra kutob.
Samtang nagsige usab og panaghan ang mga sakyanan sa kadalanan bisan sa pagmahal sa presyo sa krudo ug gasolina itandi sa pipila ka mga tuig nga nakalabay.
Kon di pa lang makadaut usab sa industriya sa sakyanan, maayo unta gani dunay ipatuman nga moratorium sa pagpalit samtang wa pay napatuman nga mass transport system dinhi sa Sugbo. O kaha i-limit ang gidaghanon sa sakyanan nga mapanag-iya sa matag pamilya ug balay.
Kay bisan pa og magbukas og bag-ong kadalanan, palapdan pa ang uban, di gihapon ni paigo sa kadaghan sa mga sakyanan.
Ang gikinahanglan ang epektibo nga mass transport system, pagsakripisyo sa publiko aron kini mapuslan. Apan kanus-a pa man kini mapatuman kay hangtod karon, kini gihapon gidebatihan.