TINUOD gyod nga dako og kausaban ang nahitabo karon sa mga ospital nga iya sa gobyerno, dili palang dugay na-admit ang akong igsuon sa Southern Philippine Medical Center (SPMC).
Sulod sa tulo ka adlaw nag-billing og P25,000 sa ospital lang, walay labot ang mga tambal nga kung sumadahon mas dako pa sa ospital billing.
Pero ninggawas nga zero ang bayranan tungod kay ang mga tambal nga sagad didto sa gawas paliton, gitubag man sa Lingap, Malasakit, DSWD, ug kon duna pa’y kulang sagot sa Philippine Charity Sweepstakes Office (PCSO) ang tanan.
Ato usab nga obserbahan nga bisan nagsugwak ang gidaghanon sa mga pasyente sa SPMC, giatiman silang tanan ug walay nagmahay tungod kay abtik ang mga doctors ug mga nurses sa pag-asikaso sa mga pasiyente nga na-admit sa maong tambalanan.
Atong pasalamatan si SPMC Chief Dr. Leopoldo L. Vega nga maoy nagdumala sa maong ospital, ug kining tanan bunga sa gipamulong sa atong Presidente Rodrigo Duterte nga sukad sa pagsugod sa iyang administrasyon una niyang giatiman ang suliran sa mga pobre.
Ang lingap, iya kining kabilin sa mayor pa siya sa atong dakbayan sa Davao ug gipalapdan kini ni Mayor Sara Duterte- Carpio, plus Malasakit ni Bong Go, ug ang lokal, ingon man national nga operation sa PCSO nga dako kaayo’g gikatabang sa atong mga igsuong kabos.
Sa laing bahin, sa politika, adtuon ta agn probinsiya sa Davao del Sur, wala na maka-aguwanta si Mayor Joseph Peñas, mianhi sa Davao ug nagpa-indorso sa atong mayor nga maoy pangulo sa Hugong Nang Pagbabago (HNP).
Sa natad sa politika, modaug ka tungod sa imong pagka ikaw ug dili sa pag-indorso sa ubang politiko.
Sa milabay'ng eleksyon sa 2013, midaug si Mayor Peñas sa pagka mayor batok kang Douglas 'Dodo' Cagas, diin kapin lang sa usa ka libo ka boto, pero karon, mao gihapon ang iyang gi-engkwentro si Cagas sa pagka-gobernador na.
Kini ba nagpasabot nga gikulbaan ug nakuyawan na si Mayor Peñas niining bugno-a? Ug gisandig ba niya kang Mayor Sara ang iyang pamolitika sa Davao del Sur? Sa ato nang giingon, modaug ka sa imong pagka ikaw, ug di sa endorsement.