DAVAO DEL SUR -- Mihimo na og inspeksyon ang mga sakop sa Bureau of Fire Protection (BFP) ngadto sa mga pwesto sa mga namaligya og pabuto sa lalawigan.
Sa siyudad sa Digos, gipangunahan ni City Fire Marshall Chief Inspector Jocelyn Grant ang paghimo og “fire safety inspection” human midagsa na ang mga baligyang pabuto aron sugaton ang Pasko alas 12:00 karong gabii.
Gikinahanglan sab nga miagi og seminar ang mga namaligya una sila mahatagan og permit sa pagbaligya niini.
Sa lungsod sa Bansalan, Davao del Sur, nag-alayon sab ang BFP ug kapulisan sa paghimo og inspection sanglit tumong niini nga luwas ang seguridad sa publiko apil ang mga dapit nga baligyaanan.
Gipasabot ni Chief Inspector Rodante Varona, hepe sa kapulisan, nga kumpiskahon gyud nila kun aduna'y mga gidiling paboto nga apil gibaligya.
Apan, parehong nag-awhag ang kapulisan ug kabumberohan nga mas maayong likayan na lamang ang pagamit sa pabuto sa Pasko ug Bag-ong Tuig aron luwas sila sanglit di matagna ang disgrasyang hatod niini.
Bisan pa man midagsa na ang mga konsumante og pabuto diin sagad nga halinon mao ang mga de-kolor nga pyrotechnic devices alang sa ilang fireworks display karong gabii. (OBD)