PADAYON pa nga nihimo sa ilang pakisusi ang kapulisan sa Poblacion Police Station sa Mandaue City Police Office sa motibo ug pag-ila sa tulo ka mga tawo nga ningpusil patay sa usa ka drug surenderer niadtong gabii sa Disyembre 25.
Ang lawas ni Randolph Gonzales, hingkod, minyo, taga sitio Chicos, Barangay Ibabao, dakbayan sa Mandaue, natusaktusak sa bala.
Gipusil kini mga alas 11 pasadao sa gabii samtang nagduwa og color games sa usa ka peryahan sa Brgy. Ibabao, duol ra sa ilang balay.
Matod ni PO3 Jason Flores, desk officer sa Poblacion Police station, nga sa pamahayag sa mga saksi, tulo ang killer nga luwan sa duha ka mga motorsiklo ang kalit nga niabot sa lugar.
Ang backrider ug ang nag-inusara nga nagsakay sa ikaduha nga motor nikanaug sa ilang gisakyan, dayon dungan nga nipusil kang Gonzales samtang kini nagdula sa peryahan.
Mokabat sa 11 ka mga kabhang sa .45 kalibre nga armas ug tulo ka mga slug ang nakuha sa crime scene.
Si Gonzales usa sa nga drug surenderer ug nasikop na kaniadto sa Police Station 1 atol sa usa ka checkpoint sayo ning tuiga human makuhai og shabu, apan na-dismiss ra ang kaso.
Gisubay pa sa kapulisan kon nagpadayon ba kini sa pagkalambigit sa ginadili nga drugas o kon adunay kontra sa ilang lugar.
Padayon pa usab sila sa pagpakig-alayon sa pamilya sa biktima alang sa dugang pakisusi, ilabi na nga susama og grabe ang kasuko sa mga mamumuno ug tuyo nga mapatay ang biktima.
“Ato pa gisusi ang lugar nga nahitabuan, kon dunaba CCTV camera, aron maila nato ang mga nipusil. Ato pud gi-dig up kon namaligya ba kini, kay human ni nadakpan, nihimo mi og monitoring, wala man mi nasubay. Ato sad gisusi kon duna ni siya nakalalis bah o nakontra,” gisaysay ni Flores sa Superbalita Cebu.