GIPANGSUSPENSO sa Games and Amusement Board (GAB) og tulo ka buwan ang duha ka mga boksidor nga sila si Rolando Magbanua ug Eugene Lagos human nga miaway kini kin didto sa Estados Unidos nga wala mokuha og permiso.
Si GAB chairman Abraham “Kahlil” Mitra ug ang mga commissioners nga sila si Eduard Trinidad ug Mario Masanguid, human sa ilang panaghugpong, maoy miluwat sa maong desisyon nga maghatag og leksiyon dili lang sa duha kon dili sa tanang mga profession boxers sa nasod.
Sa gihimo sa GAB, ilang gipamatuod nga wala silay gidapigan ug walay special treatment ni bisan kinsa nga makahimo og kalapasan sa lagda sa GAB.
Base sa records, si Magbanua miaway niadtong Pebrero 16 sa Riverside Parkway sa Austell, Georgia apan giuswag kini ngadto sa Marso 21, 2018 tungod sa kakuwang sa training ug problema sa pagproseso sa visa. Apan wa gihapon kini makakuha og permiso gikan sa GAB office.
Nasayran usab sa GAB nga padayon nga miaway si Magbanua didto sa Springs Casino sa California nga wa makakuha og pagtugot sa GAB.
Kabahin sa kang Lagos, miaway kini niadtong Disyembre 9, 2018 didto sa The Bomb Factory sa Dallas, Texas ug napildi pinaagi sa unanimous decision.
Bisan og girekomendar kini sa Texas Boxing Commission nga papahuwayon og 30 ka adlaw apan mipirma kini og kontrata ug miawayg balik niadtong Marso 22 didto sa Fantasy Springs, USA.
“Patuloy po tayo sa GAB na nagmamasid at nagpapatupad ng regulasyon. Para rin naman ito sa boxing at mga local fighters natin,” matod ni Mitra. (JBM)