GIPAABOT nga masinati na sa uban nga bahin sa Central Visayas, ilabi na sa Sugbo, ang hinay ngadto sa kasarangan ug usahay makusog nga pag-uwan, tungod sa tropical depression Usman, sugod karong hapon o sa gabii.
Pasado alas 3 niadtong Disyembre 25 sa hapon hingpit nga nakasud sa Philippine area of responsibility ang gilantawan nga katapusan nga bagyo nga niigo sa nasud ning 2018.
Matod ni Vhan Singson, weather specialist sa Philippine Atmospheric Geophysical Astronomical Services Administration (Pagasa) Mactan, posible pa nga mokusog si Usman ngadto na sa tropical storm, gikan sa tropical depression, nga kategorya human makahimo sa pag-landfall sa Eastern Visayas, ugma, Disyembre 28.
Ang bagyo, base sa alas 11 kagahapon sa buntag, nga weather bulletin, anaa kini sa 775 east sa Hinatuan, Surigao del Sur.
Aduna kini gikusgong hangin nga 55 kilometro matag oras ug paghaguros nga 65 kilometro matag takna.
Gipaabot nga moagi ang mata sa bagyo sa kadagatan sa tunga-tunga sa northernmost sa Cebu ug Masbate, ugma human sa iyang pag-landfall sa Eastern Samar, sayo o ugma sayo sa buntag.
Hinungdan nga gipaabot ang mga pag-ulan ilabi na sa amihanang bahin sa Sugbo.
“Di nato kakompyansaan kay ang iyang mga pag-ulan magdala kini og makusog nga pag-ulan sa Northern Cebu, diri sa Metro Cebu, expected gihapon nato nga naa tay light to moderate ug occasional heavy nga mga pag-ulan, ilabi na sa pag-agi sa bagyo, ma-intensify ang mga pag-ulan,” gitug-an ni Singson.
Ang publiko ug lokal nga kagamhanan gipahimangnuan sa posibleng masinati na usab nga pagbaha o pagdahili sa yuta tungod sa mga pag-ulan hangtud na karong’ weekend.
Gitug-an ni Singson nga bisan kon di makaagi sa kayutaan sa bisan asa sa tunga-tungang Kabisay-an ang mata sa bagyo, ang dayametro niini moigo sa kinatibuk-ang Cebu.
Dugang ni Singson nga posibleng masinati pag-usab ang way hunong nga pag-ulan sa Metro Cebu ug ubang bahin sa amihanang probinsya sa Sugbo, sama sa nasinati sa niaging Myerkules ngadto sa Huwebes nga dul-an 15 ka oras ang pag-uwan.
Ang Pagasa Mactan nitala na og 162.9 mm nga rainfall measurement, taas sa average nga 154.4 mm, alang sa tibuok Disyembre.
Hinuon matod ni Singson, nga anaa ra sa kategorya nga near normal ra gihapon kini.
Ang Sugbo ang adunay 25 to 30 degree Celsius nga temperature og heat index nga 37 degree Celsius, karong semanaha.