444 ka mga balay naugdaw; 12 anyos napaig

GIBANA-BANA nga 444 ka mga balay ug 593 ka mga pamilya ang apektado sa sunog nga niigo sa Barangay Duljo Fatima, dakbayan sa Sugbo niadtong Martes sa kaadlawon, Disyembre 25.

Kini nagpasabot nga 2,574 ka mga tawo ang nawagtangan og mga panimalay nga mga lumolupypo sa unom ka mga sitio nga naglakip sa Mansanitasan, Buli, Catwalk, San Pedro, Plastican ug Pasong Kabayo.

Gibana-banang labing minos P3 million ang danyos sa sunog, diin usa ka 12 anyos nga batang lalake ang namatay.

Ang biktima giilang si Cyrus John Ferras, kinsa giingong nakatulog sa usa ka internet cafe.

Giingong gipukaw si Ferras, apan nibalik kini sa pagkatulog.

Ang hinungdan sa sunog giingong nag-away nga magtiayon, diin ang asawa giingong nidaub sa motorsiklo sa iyang bana.

Ang mga nasunogan kasamtangan nga gi-evacuate sa gymnasium sa barangay.

Si Jona Mancao, 40, taga Sitio Buli, niingon nga sa paghitabo sa sunog, mao ilang namat-an nga dako na ang sunog sa ilang lugar.

“Mao na lang among namataan nga dako na kaayo ang kayo. Gipukaw mis akong mama mga alas tres pasado nya pagtan-aw nako sa bintana, duol nakay sa amoa gud nya dako naman ang kayo. Mao to ditso nalang mig gawas,” sigon niya.

Dugang niya nga aduna silay nadala nga mga gamay nga mga sinina ug naapil sa naugdaw ang ilang tindahan nga bag-o lang gi-renovate.

Si Rosalita Sacares, 49, taga Sitio Buli miingon nga nangatulog pa sila atong tungora.

“Natog mi gikan ato nya namangon nalang mi kay tungod kay daghan nag nishagit nga sunog, Nanganaog na lang mi. Akong anak nga mga lalaki mao nanghipos sa mga unsay nahabilin ba. Wa nami kibaw unsay nay kuan basta ana sila nga dako na daw kaayo ang kayo. Di na daw maabtan amoa kay duol-duol ra,” sigon niya.

Dungang niya nga naguol sila tungod sa kamatayon sa iyang pag-umangkon kinsa napaig sa sunog.

Nagkinahanglan og tabang

Tungod sa hitabo, ang mga lumolupyo nagkinahanglan og tabang.

Matod ni barangay councilor Guien Godofredo nga padayon gihapon ang ilang paghatag og mga tabang sa mga lumolupyo nga naigo sa sunog.

“Padayon gihapon ang pagpanghatag ug mga pagkaon sa atong mga biktima sa sunog ug padayon pud atong barangay health workers diri para sa kon naay gipanghilantan, mga magpa inject og anti-tetanus padayon gihapon na,” sigon niya.

Dugang niya nga ilang gipalimpyohan ang San Nicolas Elementary School para kabalhinan sa mga evacuees.

“Di namo pugson ang mga di mobalhin, ang sa gusto lang nga mobalhin kay medyo layo-layo man sya diri gamay. So, atong kuanon kong kinsa gyud ang gusto labi na tong mga dagko nga pamilya ba kay mas maayo man didto kay sakto ang lugar nya duna gyud silay sakto nga kapasilongan,” pasabot niya.

Si Cebu City Councilor Dave Tumulak miingon nga ilang gibantayan ang mga evacuees labi na ang ilang mga personal nga kalimpyohan.

“First kay nag fogging ta para pagsiguro nga way mga deadly nga mga lamok sa mga palibot sa evacuation centers. Second, ilang sanitations kaylangan hatagan ug priority. Third ang health and services. Makita naman nato nga giatiman ang mga tawo. Fourth is the food subsidy para sa mga nabiktima sa sunog good for three days. So, kana lang atong gihatag sa pagkakaron,” pasabot ni Tumulak.

Niingon usab siya nga way problema ang pagpamalik sa mga biktima sa ilang mga luna ug mag-apod-apod ang City Government ug hinabang pinansyal.

“Wa may problema ang pagbalik ang kuan lang ani kay kanus a sila nga makatukod o makabarog. Mohatag man ang city government ug financial nga tabang,” matod niya. (Jolissa Mae Taboada, USJ-R Intern)