Kumusta ang inyong Pasko mga suki? Hinaot naa ra mo sa maayong kahimtang samtang gabasa mo ning atong lindog karon.
Samtang nanagmaya ang tibuok kalibutan sa kasaulogan sa Pasko apan naluoy ko nagtan-aw sa nag-viral nga video sa nahitabong tsunami sa Indonesia nga nikalas og daghang kinabuhi.
Makita sa video ang Indonesian band nga Seventeen nga nanukar ug dunay mga nanayaw ug naa pa’y mga bata nga nagduwaduwa sa wa pa ang trahedya.
Ang halos tanan nga naa sa video ug ang banda nga naa sa stage patay tanan gawas sa ilang singer nga mao ray bugtong naka-survive.
Mao nga bisan unsa pa kakabus o kadako sa atong problema angay tang magpasalamat sa kahitas-an nga nia pa ta nanlimbasog ug nagpakalig-on aron matagamtam ang katam-is mabuhi aning kalibutana.
Kinsay kusog?
Niadtong Pasko motan-aw unta ko og “Fantastica” pero sold-out na ang tanang sinehan.
Grabeng kusoga sa pelikula ni Vice Ganda kay sa SM Cinema-Consolacion pa lang, ang linya sa mga tawo naa na dapit sa Mang Inasal.
Pero sa “Jack Em Popoy” (Vic Sotto ug Coco Martin) ug “Aurora” (Anne Curtis) naa pa kuno’y available seats pero sa Fantastica sold-out na.
Karong gabii, Huwebes, Dec. 27, ang awards night sa Metro Manila Film Festival. Kinsa kahay manghakot og awards? Abangan!
Family is love
Nakatambong ko sa Christmas party sa Cebu’s Original Lechon Belly nga gidungan sa birthday celebration ni Ma’am Gladys Gochan didto sa Parkmall diin daghan kaayong gipa-raffle.
Tua sad siyempre ang loving husband ni Gladys nga si Bossing Marlon ug ang ilang mga chikiting. Mao nang malampuson ang ilang boneless lechon kay ang ilang mga empleyado giisip na nila nga kabahin sa ilang pamilya. “Family is love.”
Merry Christmas and Happy New Year!