Niñal: Jingle Bullies

Dili pa panahon sa kampanya apan may pipila na ka jingle ang atong madungog sa radyo nga nagdala sa pangan sa mga politiko nga managan sa eleksyon sunod tuig. Bisan tuod og klaro nga pagpangampanya ang gibuhat aning mga tawhana, makalusot sila pinaagi sa pag-ingon nga wala man sila nag-aghat sa publiko sa pagbotar nila.

Bitaw pud. Wala sa lyrics sa ilang mga jingle ang pulong nga “iboto ninyo si.....” o “Iboto ko ninyo.” Igo lang gibalik-balik sa kanta ang ilang pangan nga gipakapinan og mubo nga deskripsyon sa ilang personalidad. Sa ingon ini nga depensa, ilang gipasabot nga bisan kinsa nato makabuhat og jingle nga nagsibya sa atong pangan ug ipatukar kini sa radyo isip komersyal. Bawal ba diay na?

Apan lahi ni sila kay managan man gud ni sila karong umaabot eleksyon. Klaro kaayo nga pangampanya ang ilang tuyo. Daagon lang ta sa teknikal aning mga animal.

Pero, in fairness, sa mga kagwang, catchy ilang mga jingle. Motatak gyod sa imong ulo ang ilang pangan, nga mao gyod ang tuyo sa jingle - kining gitawag sa iningles og name recall. Ang tuyo sa jingle mao ang pag-promote sa pangan sa usa ka brand aron ma-memorize sa mga tawo. Apil ang jingle sa mga gitawag natog commercial sa TV ug radyo. Commercial, gikan sa root word nga commerce, suportado sa usa ka advertiser.

Ining dapita, ang pangan sa politiko usa ka brand nga gi-promote pinaagi sa jingle. Isip brand, ang politiko usa ka commercial. Mao nga sa Binisaya, ang commercial gitawag og pahinumdom. Ug kon mobalik ta sa iningles, ang pahinumdom mao nang reminder. Mao nga moingon dayon ang DJ sa radyo, “Let’s pause for some reminders.”

Kay name recall man ang iyang tuyo, kinahanglang balik-balikon sa jingle ang pangan sa brand o sa politiko. Basic sa jingle writing ang repetition. Gani, gi-define sa diksyonaryo ang jingle nga “short verse or song marked by catchy repetition.” Mao nga kon mag-jingle ka, seguroa nga gibalik-balik sa lyrics ang imong brand o ang imong pangan.

Dinhi sipyat ang kadaghanan sa mga politiko. Gusto nila nga ibutang sa jingle ang tanang nindot nga nahimo nila sa kinabuhi, apil na atong na-leader sila sa boy scout pag elementary ug katong Best in Night Gown sila sa Search for Miss Barangay Tabili 1990 ug 1991. Unsaon pa man paghimong catchy ug repetition sa imong jingle anang kalakiha nga tibuok biography na man imong gibutang sa kanta?

Isip songwriter, dinhi ko bilib ining duha ka jingle nga regular na nga gipatukar sa mga radyo karon. Grabe ang name recall, catchy kaayo ug repetitious. Tinuod sapoton kang maminaw usahay, labi nag wa ka kauyon sa kandidato. Maka-irita. Maguba imong adlaw. Ma-offend imong sensibilities. Morag tusokon imong dunggan og dagom. Sila ang jingle version sa bullying.

Apan sure ko ningtatak na ang ilang mga pangan sa imong alimpatakan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph