KADAGHANAN sa mga Pinoy ang mosugat sa Bag-ong Tuig nga maikagon dala ang paglaum nga magmahamugaway ang kinabuhi sa tuig 2019.
Dala sa kalamboan nga gikahatud sa administrasyong Duterte sa tibuok nasud mas malaumon ang katawhan nga labaw pa ang pagbuhagay sa mga proyekto sa gobyerno kon mapatuman ang mga gilagdaan nga kasabutan uban sa langyaw'ng kanasuran.
Dili angay kabalak-an nga basin dili mapahigayon ang gikatakda nga election sunod tuig bisan pa man napakyas ang Kongreso pag-aproba sa budget alang sa tuig 2019 tungod dunay contingency fund ang gobyerno aron pagpahigayon sa election matud ni partylist representative Jericho Nograles.
Sa mga natagamtam nga kalamboan sa kasamtangan nga administrasyon, gipakita ni President Digong Duterte sa katawhan nga daghan diay ang mahimo sa gobyerno kon sensiro lang ang mga pangulo, dunay political will ug lig-on ang baruganan.
Tungod sa kaayohan nga nakita sa katawhan luyo sa pagbabag sa mga oposisyon, mas daghan ang nagalantaw nga posibleng mangharus sa election ang nga kandidato nga gi-endorso sa pangulo uban sa panglataw nga mas paspas pa ang paghatud sa mga proyekto ug serbisyo kon dili lang kanunay babagan ug himuon nga isyu sa mga kritiko sa pangulo ang buot ipatuman nga proyekto.
Gani man sa dakbayan mismo ni Presidente Digong, dawat na sa katawhan ang pamaagi sa paglimpyo sa katilingban gikan sa mga kriminal kay wa may mitiyabaw nga miingon nga dunay paglapas sa human rights dihang nangatigbak ang mga kriminal diin nag-una sa area sa Talomo Police Station bisan pareha ang hinungdan sa ilang kamatayon nga nangilog og armas sa pulis tungod sagad kanila dili na matulon sa katawhan ang gihimong krimen.
Bisan pa kanunay ginalakbitan sa Pangulo ang hiwi nga mga binuhatan sa mga pangulo sa simbahan ug mga taga simbahan nga monumbalik pagbatikos kang Digong, padayon ang pag-ampo sa katawhan nga unta hatagan siya'g taas pang katuigan aron pagserbisyo sa katawhan gawas niadtong mga nag-ampo nga unta hatagan siya'g balatian.
Atong i-ampo nga mamahimong malambuon ug madasigon ang atong nasud sa tuig 2019. Happy New Year sa tanan.