LIMA ka local government units sa probinsya sa Sugbo ang napili nga makadawat sa P40 milyones nga ayuda sa Kapitolyo alang sa pagpatuman og mga proyekto ug pagpalit og mga ekipo kabahin sa solid waste management.
Si Lito Comendador, administrative aide sa Provincial Environment and Natural Resources (Penro) niila sa mga LGU nga naglangkob sa mga lungsod sa Moalboal, Dalaguete, San Remigio, Sta. Fe sa isla sa Bantayan ug San Francisco sa isla sa Camotes.
Matod niya, ang P40 milyones bahinon sa lima diin matag usa niini makadawat og tag P8 milyones nga maoy gamiton sa pagpalit og mga ekipo nga magamit sa saktong paglabay sa basura.
Sigon ni Comendador, ang League of Municipalities of the Philippines (LMP) Cebu Province Chapter nga gipangulohan ni Tuburan Mayor Democrito Diamante ang nagpili sa lima ka mga LGU.
Si Diamante nipasabot napilian ang maong mga lugar tungod sa strategic nga mga lokasyon niini ug iyang gi-waive alang alang sa ilang lungsod ug gihatag sa San Remigio sanglit duna sila’y kaugalingong material recovery facility (MRF).
Sumala ni Comendador napili usab ang San Francisco tungod kay nindot ang mga pamaagi niini sa paghipos sa mga basura diin maseguro nga magamit ang pasilidad.
Ang lima ka mga LGU kay gi-cluster diin ang Moalboal nga maoy sentro sa habagatang mga lungsod maoy modawat sa mga basura nga gikan sa Alegria, Badian, Alcantara, Ronda, ug mahimo usab ang Dumanjug; samtang sa San Remigio ang mga basura nga gikan sa Medellin, siyudad sa Bogo ug Tabuelan.
Ang dawaton sa Dalaguete ang gikan sa mga silingang lungsod sa Boljoon ug Alcoy; gikan sa Madridejos ug Bantayan sa Sta. Fe; samtang gikan sa Pilar, Tudela ug Poro ang ilabay sa San Francisco.
Si Comendador namahayag ang paagi sa mga LGU sa pagdawat sa maong pundo gikan sa Kapitolyo mao ang paglagda og memorandum of agreement sa sunod tuig tali niini ug sa Provincial Government samtang laing MOA ang pirmahan tali sa mga lungsod ug siyudad nga ka-cluster niini.
Siya nidugang ang counterpart sa lima ka mga LGU sa pagdawat sa ayuda mao ang yuta nga butangan sa mas dako nga material recovery facilities ug pagpatukod og edipisyo nga butangan sa mga makina o ekipo nga magamit sa solid waste management.
Apil sa mga ekipo o makina nga paliton gamit ang maong pundo mao ang shredder alang sa pagpinopino sa mga plastik nga basura, composter alang sa malata nga mga basura, crusher alang sa mga botilya nga di mahalin, conveyor alang sa final sorting ug uban pa.
Si Comendador nipasabot nga tuyo sa ayuda sa Kapitolyo nga maminosan ang basura nga ilabay sa sanitary landfill.
Dili modawat ang pasilidad og diaper, sanitary napkins ug special waste gikan sa mga tambalanan.
Ang P40 milyones nga budget giapil sa Annual Investment Plan (AIP) sa kagamhanan sa lalawigan sa Sugbo karong tuiga.
Ang labing dako nga pahat sa pundo gitagana alang sa pagsuporta sa Kapitolyo sa mga proyekto sa environmental management subay sa solid waste management.
Ubos sa balaod, gikinahanglan nga wagtangon ang mga open dumpsite ug hulipan og sanitary landfill ug material recovery o recycling facilities. Ang mga opisyal nga dili makatuman niini pasakaan og tukmang mga kaso ug matangtang sa trabaho sa katungdanan isip kabahin sa silot. SCG