ANG grupo sa New People's Army maoy gitumbok sa mga otoridad nga mipatay sa usa ka mag-uuma didto sa probinsiya sa Cotabato.
Ang kapulisan nag-ila sa biktima nga mao si Terzo Candido, 45 anyos, minyo, ug molupyo sa barangay Binay Magpet.
Subay sa taho gikan sa Cotabato Police Provincial Office, nga alas 7:00 sa gabii, Martes, nahitabo ang krimen.
Ang biktima samtang naglakaw pauli sa ilang bay gikan sa barangay Poblcion kalit lang nga giharang sa lima ka mga armadong lalaki, gipugos sa pagdala sa wala matino nga lugar.
Alas 6:00 na sa buntag nakit-an ang iyang patay'ng lawas sa mga sibilyan nga gihulog duol sa kanal.
Ang biktima naka-angkon og ubay-ubay ka mga samad pinusilan sa nagkadaiyang parte sa iyang lawas.
Matud ni Esmeralda, sa wala pa gipatay ang iyang bana, gibaharan na kini sa mga NPA nga dili maguban-uban sa mga sundalo aron dili siya madigrasya.
Gi-akusahan sa mga rebelde si Candido nga asset sa militar.
Siya sab ang gitudlong mitug-an sa nahimutangan sa mga rebelde mao nga pipila kanila nadakpan sa mga sundalo.
Gipahayag ni 57th Infantry Battalion Philippine Army Commanding Officer Colonel Bernie Langub nga mas gilig-on nila karon ang operasyon batok sa mga NPA gumikan sa daghang mulo nga ilang nadawat gikan sa katawhan.
Ang kapulisan padayong nagsubay sa tinuod nga motibo sa kamatayon sa biktima. (Edgardo Fuerzas)