Ernesto D. Lariosa
San Fernando, Cebu
HUMAN kalimpiyuhi ni Edok ang tibuok Fuente Osmena sa layang mga dahon ug sa nagkatag nga mga putos sa ice- drop mipahuway siya sa lingkuranan atbang sa higanteng Christmas tree. Human makahingos sa bugnawng hangin sa kabuntagon nangagho siya di sa kakapoy kondi sa usa ka suliran nga naghamok kaniya. Kabos tuod kaayo siya apan dugay na niyang gipatunhay ang katarong sa iyang pagkatawo isip metro aide sa Siyudad.
“Kausa ra gud na, masulbad dayon nimo ang imong kawad-on. Makabayad ka sa tanan mong utang sa tindahan ug sa mga loan shark sa City Hall nga nagpuli-puli lag paningil kanimo. Labaw sa tanan matuman ang gisaad mo sa imong anak nga palitag bag-ong sapatos isip pinaskuhan.” Mao kini ang kanunayng mohunghong kaniya ang tingog nga gikan sa kahilom.
“ Tay ha? Paliti kog bag-ong sapatos ug sinina kay muhaw na kaayo ang duha ko ka mga sinina ug hilis na sad kaayo ang tikod sa akong sapatos.”
Naluoy siya sa iyang anak nga si Alona nga Grade 5 na nga ahaw sa pamiste. Unsaon, husto ra man ang iyang suweldo sa ilang panginahanglanon nga iyang giseguro gawas sa mga utang. Okey lang ang iyang asawa nga si Imelda kay di kapritsusa ug nakasabot sa ilang kahimtang, Naa ra kini nag-atiman sa ilang pagpuyo.
Nangagho na sad si Edok. Gilantaw niya ang gitas-on sa Christmas Tree sa iyang atubangan daw mapagarbuhong nagdamgo pagkab-ot sa panganod. Sayod siya nga inig-abot sa kagabhion daw usa kini ka lawas sa paraiso nga gipakidlap-kidlap sa mga mata sa mga sugang dagitabnon. Ang mga kabos sama kaniya madasig sa katahom niini apan sa daklit lamang nga mosuot sa ilang galamhan kay mahanaw inigtimpasaw sa kabuntagon. Mitindog siya. Di na maliso ang iyang hukom. Duna siyay tawo nga adtuon aron katibhangan ang iyang gibati.
Usa ka adlaw, gipatawag siya sa mayor. Gikulbaan siya. Ngano kaha? Diha ra ba toy huhungihong nga manaktak ang City Hall. Sa sud sa opisina nga bugnaw nahimut-okan siya dihang mitindog ang mayor, milamano ug migakos niya. “Usa ikaw ka honest nga tawo, Eduardo, nalipay ang akong higala nga si Mr. George Wright sa World Bank nga imong giuli ang iyang pitaka nga gawas sa kuwarta may sud nga mga ATM cards ug yawe sa iyang vault .” Wa siya makatingog. Naamang siya sa gipamulong sa mayor. “ I-promote ko ikaw nga regular supervisor sa mga metro aide, nagkinahanglan kog tawo sama nimo.”
Nalipay kaayo ang iyang asawa ug anak sa iyang promosyon. Nakahilak gud ang iyang asawa. Labi na sa saad sa mayor kaniya nga doblehon ang iyang bonus nga madawat sa di pa ang Pasko. Mabayran na ang tanan niyang utang. Labaw sa tanan makapalit na siyag sinina ug sapatos sa iyang anak apil pud ang iyang asawa nga nagkinahanglan niini nga wa lang makasulti.
Sabado. May package nga miabot gikan sa World Bank sa New York. Giablihan ni Edok atubangan sa iyang asawa ug anak. Nakugang sila kay usa ka tseke balor og P200,000. ug dokumento paghatag og usa ka Camella Home sa subdivision sa Talisay City. Wa gihapon makatingog si Edok apil na ang iyang asawa ug anak. May gamayng note: “Thanks a lot, I”ll be back soon to the Philippines to see you, Mr. Ed de los Reyes, Merry Christmas. ”---- George Wright. Sa kalipay naggaksanay silang tulo. (KATAPUSAN)