TULO ka adlaw na lang, magsugod na ang tuig 2019. Pero taym pa. Kumusta man ang inyong Pasko?
Akong namatikdan nga wa na kaayo’y kusog nga butobuto. Panagsa ug hinay na lang. Duna hinooy fireworks display. Tungod niini, basin kon menos o labing maayo kon way naaksidente.
Hinaut nga ingon usab niini ang masinati nato sa pagsugat sa bag-ong tuig: malinawon ug hapsay. Aron way si bisan kinsa nga bati-on og sakit sa lawas samtang ang uban nagsadya.
Mga panghinaut sa usa ka malipayon, mabulokon, mauswagon ug bulahang tuig 2019 kanatong tanan!
Duha ka semana ang nilabay, pito ka mga sakop sa gitawag og regional media (lima taga Cebu, duha taga Davao) ang gihatagan sa ABS-CBN sa kahigayonan nga makakita sa Family Is Love The 2018 ABS-CBN Christmas Concert didto sa Araneta Coliseum.
Gisalida kini nianang pagka Sabado ug Dominggo dayon.
Sa ikaduhang adlaw, gipasulod ang tanang taga media sa gitawag og Studio Experience nga nahimutang sa Trinoma Ayala Mall.
Sa Studio Experience, morag makaapil sa mga programa sa Kapamilya Network ang mosulod niini sama sa The Voice, Minute To Win It, Pinoy Big Brother, It’s Showtime ug uban pa.
May ganting salapi ang molampos sa mga challenges sama sa The Voice diin makapatuyok ang mokanta (sa video lang hinoon) sa upat ka mga coaches (Sarah Geronimo, Sharon Cuneta, Lea Salonga ug Bamboo).
Sa tanang dinapit ug nisuway, ang Sun.Star Live Editor nga si Luis Quibranza III ra gyuy nakapatuyok sa upat ka coaches timailhan nga di mawani ang taga Cebu kon kinantahay ang hisgutan.
Human niadto, gihimo ang Christmas party sa usa ka Korean restaurant diin duol sa tunga sa milyon ka pesos ang balor sa mga premyo ang gibola. Way niuli nga luhaan namo. Salamat, ABS-CBN.
Pila na ka pelikula sa Metro Manila Film Festival ang inyong natan-aw? Sa pagsulat ko niini, wa pa gyud koy natan-aw bisan usa.
Pero inig layat nako sa kaulohan sugod sa Dominggo, daghan o tanan tingali akong matan-aw kay gipasaligan ko ni Ms. Angela Javier Cruz sa GMA 7 nga hatagan ko niyag pases sa tanang pelikula. Salamat, Ms. Angela!
Ako diayng pasalamatan ang nahinumdom nako sa niaging Pasko sama sa nitimbaya ug nipadalag panghinaut sa text ug Messenger sa usa ka malipayong pagsaulog ingon man niadtong nitakilid gyud aron makahatag og gasa.
Kaninyong tanan, daghang salamat. Hinaut nga mas magmabungahon pa ang inyong paningkamot sa tuig 2019! God bless you all!