KARONG naghinapos na ang 2018 ug sugaton nato ang 2019, seguro nagsugod namo sa paglista sa mga dapit nga posibling inyong bisitahon sunod tuig nga buot ninyong kalaagan.
Ilakip sa inyong listahan ang nailang eco-adventure destination nga nahimitang sa lalawigan sa Antique sakop sa isla sa Panay, ang Calawag Mountain Resort nga nahimutang sa Barangay Tuno, lungsod sa Tibiao, Antique.
Mobiyahe kag lima ngadto sa unom ka oras gikan sa Iloilo International Airport, nga nahimutang sa Cabatuan, Iloilo ug Molo Terminal sa dakbayan sa Iloilo nga pwede kang mosakay og bus ug van nga mopaingon sa Caticlan, Pandan o Culasi apan haduol nalang kini sa Boracay diin biyahion lang nimo kini og mosobra sa duha ka oras.
Ang Calawag Mountain Resort gidagsa kini karon sa mga turista sa nagkadaiyang dapit sa kalibutan kay naila kini sa “kawa” nga diin maoy gihimo nga kaliguanan sa mga tawo diin nag-aso ang kainit sa tubig niini.
Di lang ordinaryo nga kaligo ang imong mga matagamtaman kay ang gitawag nga Kawa Hot Bath aduna kini mga flavor sama sa asin, turmeric, gatas, kape, beer, ug bino.
Ang salt (asin) bath maoy labing barato kay anaa sa P299 ang bayad niini samtang ang uban anaa sa P399 ang bayad ug ang wine (bino) bath ang labing mahal nga anaa sa P599 diin imo kining matagamtam sud sa 30 minutos.
Adunay kawa nga mosud og usa lang ka tawo apan nagdalit usab silag dagko nga kawa nga masud niini ang ang duha ngadto sa tulo ka tawo.
Kon mosuway kana sa Kawa Hot Kawa andamon kini sa mga staff pinaagi sa pagbutang niinig tubig nga nga gipabukal nang daan unya butangan nig mga buwak ug sugnoran ang kayo ilawom sa kawa. Imong mahangyo ang mga staff kon init na kaayo nga ipakuha ang kayo.
Nahimong kaliguanan ning kawa sa Calawag Mountain Resort human niminos na ang produksyon sa asukar sa Tibiao diin ang mga kawa maoy gigamit sa paghimo sa asukar. Ning higayona, aduna gihapoy mga lungsod sa Antique nga padayon nga naghimo og asukar diin naila niana ang muscovado nga ilang gi-export sa Korea.
Gawas sa Kawa Hot Bath, imo usab nga masuwayan ang water adventures, boodle fight nga anaa sa sapa, fish spa ug body massage.
Sa water adventures nagdalit silag extreme water tubing, river kayaking, kayaking downstream ug Tibiao River Trampoline diin anaa sa P99 ngadto sa P899 ang bayad niini matag tawo sud sa 30 minutos.
Pwede sa imong matilawan ang mga Kinaray-a nga mga putahi sa ilang Boodle fight nga ilang isilbi nganha sa mga lamesa nga anaa sa sapa diin anaa ang tubig sa imong mga tiil o kaha sa paa.
Aduna silay Tibiao Fish Spa, half-body massage, ug foot massage nga P119 ang bayad sud sa 30 minutos uban sa full body massage ug coffee body scrub nga sa usa sa oras mobayad kag P349.
Kon naghuna-huna ka nga bisitahon pagbalik ang bag-o nang Boracay Island, ilakip sa imong listahan ang Kawa Hot bath sa Antique aron makompleto ang imong biyahe sa Panay Island sunod tuig.