KAPULISAN sa Central Visayas nakatala lang og lima ka insidente sa biktima sa pabuto ug duha ang naangol sa saag nga bala samtang moabot sa kapin tunga sa P500 million nga balor sa illegal nga pabuto ang nasakmit.
Sa data nga gipahibawo sa Police Regional Office 7 nakatala lang sila og lima ka insidente sa pabuto ang nahitabo sa tibuok rehiyon apan sa Department of Health mitala silag 14 nga mas ubos kini itandi sa mga nabuthan sa tuig 2015 hangtod 2017.
Niadtong 2015 nakalista ang kapulisan og 54 nga nabuthan, 67 sa 2016 ug 32 sa 2017 gikan sa desembre 6 hangtod Enero 2 apan matod ni Chief Supt. Debold sinas nga mosaka pa hinuon kini sanglit wala pa moabot ang pagsugat sa bag-ong tuig.
Adunay duha ka insidente sa stray bullet nga nahitabo didto sa lalawigan sa Bohol nga napusilan ra usab sa iyang kaugalingong amahan nga usa ka barangay tanod nga naa na karon sa kustodiya sa kapulisan.
Naigo sa bala mao si Riche Mae Octubre 18, taga sitio Talisay barangay Lucob lungsod sa Calape.
Nadakpan ang amahan nga usa ka barangay tanod nga si Rey Octubre, 49.
Samtang gisusi pa usab kung unsa ka tinuod nga naigo sa saag nga bala ang usa ka lalake sa Tagbilaran o naunay ba kini sa iyang armas.
Usa sa mga rason, matod ni General Sinas, nganong mas gamay karon ang nabiktima sa pabuto itandi sa tulo ka tuig nga insidente tungod sa estriktong pagpatuman sa mga lagda sa pagbaligya ug asa lang maka himo sa pagpa buto.
Gani sa gihimong inspeksyon sa PRO-7 sa mga designated fire cracker zone sa South Road Properties nakasakmit ang Cebu City Police Office ug dul-an sa tunga sa milyon ka pesos nga balor sa illegal nga pabuto nga gibaligya.
Lakip sa naka-imbargo sa mga illegal nga pabuto nga wala motuman sa lagda sa firearms explosive unit sa PRO-7 mao ang syudad sa Mandaue ug Lapu-lapu nga moabot ang tanan sa dul-anP700,000.
Naka full alert na usab og sugod ang kapulisan sa tibuok rehiyon tungod sa pagsaulog sa anibersaryo sa New Peoples Army.
Aduna nay naka estambay mga personnel ang CCPO nga maoy mo responde kung adunay hulga sa terorismo sa syudad sa Sugbo.