GIKATAHAPANG drug pusher ug tulisan patay human giingong nisukol sa kapulisan atol sa buy bust sa alas 7:15 sa buntag kagahapon, Disyembre 27, sa Purok 4, Brgy. Jaclupan, dakbayan sa Talisay.

Patay si Dexter Rabago, 43, nagpuyo sa Jaclupan. Nakasibat si Willy Labitad, kinsa samaran.

Gipusasan si Josepino Salonoy, 48, minyo, ug Levin Doronea, 27, kinsa nakuhaan og drugas uban sa usa ka 17 anyos nga lalake.

Nakuha sa kapulisan ang 24 ka medium nga putos sa shabu ug upat ka gamay nga triangle nga putos nga shabu. Motimbang ang shabu sa 120.16 gramos nga mobalor og P817,088 sa presyo sa Dangerous Drugs Board (DDB) ug buybust money nga P12,000; usa ka kalibre .45 nga pistola nga dunay pito ka bala; usa ka 9mm revolver nga dunay upat ka bala, drug sniffing paraphernalias ug usa ka black holster sa kalibre .45, ug tulo ka video karera machines.

Si Sr. Insp. Alejandro Batobalonos, hepe sa Provincial Drugs Endorcement Units (PDEU-CPPO), nangulo sa operasyon uban sa mga sakop Provincial Intelligence Branch (PIB) nga nahinabi sa mga tigbalita, nagkanayon nga nadawat silag impormasyon kabahin sa ilegal nga kalihukan ni Rabago ug Labitad.

Gikatransact nila si Rabago.

Nakabantay si Rabago nga pulis ang gika-transact, mibunot sa gidalang pistola ug namusil.

Nahitabo ang pinusilay hangtud nga naigo si Rabago.

Sumala pa ni Batobalonos, nga nagtuo sab sila atol sa sinukliay sa bala nga didto si Labatid sa sulod sa balay ni Rabago.

Dali nilang gisuhid ang maong dapit didto sa karerahan duol sa pinuy-anan ni Rabago ug naabtan si Labitad.

Sa pagkakita ni Labitad sa mga operatiba midagan kini samtang nagsigeg pamusil.

Nahitabo sab ang pinusilay ug naigo si Labitad apan nakasibat sa bukid nga dapit nga daghang kakahuyan.

Si Batobalonos, miingon nga samtang nag-inventory nabati nila sa pikas bungtod ang pagsigeg pabuto ni Labitad nga nanghagit kanila.

Gibutyag ni Batobalonos nga si Rabago, usa ka nailhang pusher ug tulisan nga maoy suspek sa pagtulis ug pagdunggab sa usa ka taxi drayber sa miaging katuigan pero wa kini mapasaka-i og kaso.

Way pinusilay?

Basi sa sulti mga silingan ni Rabago naglingkod sila sa gawas human ming abot ang mga PIB og gipasulod sila sa ilang mga balay para dili madamay sa maong buy-bust.

Nagkanayon si Dalia Rabago, 17, usa sa anak ni Rabago, saksi siya sa panghitabo sa iyang amahan na gisulod kini sa mga pulis ang ilang balay hinungdan na nakamata kini ug sunod gipusil.

Saysay ni Dalia sa Superbalita Cebu nga wala mosukol iyang amahan sa mga pulis.

“Naminaw raman ko sa gawas, human nakadungog nakog lima ka buto sa pusil” dugang ni Dalia. (Siesmundo H. Angelo, Jr. - USJ-R Intern)