SA MGA kinahanglan nga mogawas sa ilang mga panimalay karong adlawa, ayaw kalimti ang payong, kapute o bisan unsa nga panangga sa ulan.
Matod sa Philippine Atmospheric Geophysical Astronomical Services Administration (Pagasa) nga tibuok adlaw karon, Disyembre 28, masinati ang uwan dala sa bagyo nga Usman.
Pasidaan ni Jhomer Eclarino, weather specialist sa Pagasa Mactan, nga masinati ang hinay ngadto sa kasarangan ug panagsang kusog nga mga pag-ulan dinhi sa Sugbo, ilabi na sa Northern Cebu, kansang lugar, lakip na ang isla sa Camotes, gipaubos na kagahapon pa lang sa Storm Signal number 1.
Karong buntag, gipanlantawan nga mokusog gikan sa tropical depression ngadto na sa tropical storm ang bagyo nga Usman.
Gilantawan nga mo-landfall kini sa Eastern Samar karong hapon kon di mousab ang gikusgon sa pag-irog niini ug direksyon.
“Makasinati ta og occasional heavy rains, posible na ang landslides ug flash floods. So in Cebu, in general, naa tay light to moderate with occasional heavy rains. Magbantay ta cause ang dala ng ulan ng bagyong Usman,” pagpasabot ni Eclarino.
Ang bagyo adunay gikusgong hangin nga 55 kilometro matag oras ug paghaguros nga 65 kilometro matag takna.
Nag-irog kini sa 15 kilometros matag takna, kagahapon, kon moabot sa 60 ngadto sa 80 kilometro matag takna ang gikusgon sa hangin.
Pangandam
Nibutyag si Cebu City Transportation Office Operations Chief Francisco Ouano, nga mag andam sila og labing minus 10 ka mga bus isip pagpangandam kon adunay mga pasahero nga ma stranded tungod sa bagyong Usman, karong adlawa, Disyembre 28.
“Gipangandaman kay kahibaw gyud ta nga mosulod na diri sa atoa. Magpa dagan siguro ta og buses kon kinahanglan gyud. So, ang atong mga enforcers full alert sad. I think also ang disaster management aware man sad sila pero dili gyud nato kumpyansahan,” matod ni Ouano sa Superbalita Cebu.
Ang 10 ka libreng mga buses nga i-deploy sa CCTO karong adlawa mahimutang sa Bulacao paingon downtown area ug lima sab ngadto sa Talamban.
“In behalf sa Citom, in case nga mo grabe ug ma stranded ang mga pasahero, magpadagan ta sa north ug sa south area” matod ni Ouano.
Si Cebu City Disaster Risk Reduction Management Office (CCDRRMC) chief, Nagiel Banacia miingon sa usa ka interbyu kagahapong adlawa nga dili pa kinahanglan mo evacuate ang mga residente sa Buhisan tungod kay wa pa nag uwan.
“Wala pa tay nakita kay wala pa nag uwan. Kailangan na natong i-evacuate kon nag uwan na ni siya pila ka adlaw, wala paman ta’y nakita sa pagkakaron,” pagpasabot ni Bañacia.
Di patabukon
Giawhag karon ni Lapu-Lapu City Mayor Paz Radaza ang mga Oponganon sa isla sa Olango sa pagpuyo na lang sa ilang tagsa-tagsa ka mga panimalay ug di na lang molabang sa mainland nunot ning gikatakdang pag-agi sa bagyong Usman sa Sugbo.
Matod sa mayor nga nasayod siya nga daghan sa mga taga isla ang motabok sa mainland aron mangompra hilabi na nga nagsingabot na usab ang Bag-ong Tuig. (FMD, GCM, Kiziah Marie T. Suello, USJ-R Intern)