GIPANGLANTAWAN nga mas daghang pasahero ang stranded karong adlawa ug daghang biyahe sa dagat ang di makalawig tungod sa Bagyong Usman.
Kagahapon, Disyembre 27, alas 4:00 sa hapon, niabot na sa 803 ka pasahero ang stranded, 61 ka rolling cargoes; 20 ka sakayan; ug 5 ka motorbancas ang wa na pabiyahia sa Philippine Coast Guard (PCG) 7.
Sa Sugbo, 603 ka pasahero ang stranded, 54 ka rolling cargoes; 20 ka sakayan ug 2 ka motorbanca ang wala pabiyahea.
Samtang sa Bohol, 200 ang stranded, pito ka rolling cargoes ug tulo ka motorbanca ang wala pabiyahia.
Sa datus sa PCG 7, wala nila tuguti na ang biyahe sa Sugbo nga paingon sa Eastern Samar sugod pa lang niadtong Miyerkules, Disyembre 26, sa gabii.
Kagahapon sa alas 5:30 sa buntag, wa na usa’y biyahe gikan sa Sugbo paingon sa Sorsogon, Masbate, ug Ticao Island sa Luzon.
Norther Samar, Samar, Biliran, Leyte, Southern Leyte, Northern Cebu, ug Camotes sa Visayas ug Dinagat Island sa Mindanao.
Sa Bohol usab wa na pabiyahia ang barko nga paingon sa Sorsogon, Masbate, Ticao Island, Eastern Samar, Northern Samar, Samar, Biliran, Leyte, southern Leyte, Northern Cebu, Camotes Island, ug sa Dinagat Island.
Alas 11:00 sa buntag kagahapon dihang wala na usab tuguti ang biyahe gikan sa Sugbo paingon sa Romblon, Cantanduanes, Camarines Sur, Albay, ug Manila sa Luzon.
Ug Aklan, Capiz, Northern Ilo-ilo, ug Northern Negros Occidental sa Visayas.
Gisugdan na sa Pagasa pag-isa ang Gale Warning sa pipila ka dapit sa nasod sugod niadtong Miyerkules.
Ang gale warning mao ang paghatag og impormasyon sa maong weather agency ngadto sa mga tagdumala sa barko nga dagko ang bawod. (HBL)