GIARESTO ang kontra ni boxing superstar Manny Pacquiao karong Enero 19 nga si Adrien Broner pipila ka adlaw sa wala pa ang kasaulogan sa Pasko tungod sa kaso kalabot sa iyang pagmaneho og sakyanan niadtong 2017.
Hinuon gibuhian ra usab dayon kini, matod sa taho sa TMZ, ang US entertainment news website.
Matod pa sa TMZ nga si Broner kinsa mosuway og langkat sa WBA welterweight title ni Pacquiao, gidakop duha ka adlaw sa di pa ang Pasko didto a Boward County, Florida.
Ang arrest warrant ni Broner nagagumikan sa iyang kason niadtong Disyembre 2017 diin ang maong boksidor nasakpan nga nimaneho og sakyanan nga walay lisensiya, kusog nagpadagan ug walay registration ug wa makapakita og dokumento sa insurance.
Pipila ka higayon wa usab kini moatubang sa korte.
Hangtod ning pagsulat, wa pay pamahayag nga giluwatan kon kining nahitabo karon sa 29-anyos nga Broner makaapektar ba sa ilang umaabot nga away didto sa MGM Grand sa Las Vegas.
Sa kasamtangan, si Pacquiao atoa na karon sa Los Angeles aron pagsinati sa klima ug sa pagpadayon sa iyang training. Hinuon kagahapon wala kini makapahigayon sa iyang ensayo tungod sa ubang committment.
Subay niini, si kanhi two-time world boxing champion Gerry Penalosa, suod nga higala ni Pacquiao, mibutyag sa niaging adlaw nga nakigsabotsabot na siya sa ESPN5 ug GMA-7 alang sa pagpasalida sa Pacquiao-Broner fight.
Ang Skycable usab ug ang Cignal maoy mohimo sa live telecast pinaagi sa pay-per-view.
Si Peñalosa maoy nakakuha sa TV rights sa Pilipinas sa mang away ubos sa pagsuporta sa mga Japanese investors.
Ang bayad sa maong rights gikataho nga mokantidad og $2.5 ngadto sa 3 Million.
Gawas sa Pacquiao-Broner main event fight, malakip usab sa TV coverage ang away ni interim WBA featherweight champion Jhack Tepora kinsa modepensa sa iyang titulo batok ni kanhi WBC superbantamweight titleholder Hugo Ruiz sa Mexico ug ang away ni three-time Olympian Rau’shee Warren sa Cincinanti ug Nordine Oubaalin sa France. (JBM)