ANG daghang nasud sa kalibutan ug sa nagkalainlaing Christian traditions, ang Pasko sa pagkatawo ni Hesus saulogon sa naglainlaing petsa ug sa taas nga panahon.
Ang ubang mga simbahan, labi na ang Orthodox, migamit og laing kalendaryo alang sa ilang religious celebration. Ang mga Orthodox sa Russia, Serbia, Jerusalem, Ukraine, Ethiopia ug ubang mga nasud migamit sa karaang Julian calendar ug ang mga tawo niining maong mga nasud magsaulog sa Pasko kun Christmas matag Enero 7.
Aduna usay pipila ka mga Greek Catholics nga magsaulog sa ilang Pasko sa Enero 7. Sa Armenia, ang Apostolic church magsaulog sa Pasko matag Enero 6.
Ang Christmas celebration magsugod sa Christmas day ug matapus human sa 12 ka adlaw. Mao kini gitawag nga “12 days of Christmas.” Ang celebrasyon mahuman sa gabii sa Enero 5, nga gitawag og “Twelfth Night.” Sa tibuok kasaysayan ang “12 days of Christmas” maoy panahon sa kumbira ug kalingawan. Human sa 12 ka adlaw kun sa Enero 6, mao ang Epiphany, dihang atong hinumduman ang wise men ( nga usahay tawgon og Three Kings) nga mibisita kang Hesus sa iyang pagkatawo.
Human sa ika-12 ka gabii mao ang panahon nga hipuson na ang Christmas decorations apan adunay ubang mga tawo nga ila kining ibilin hangtud sa Candlemas. Ang Candlemas naila usab nga “Presentation of Jesus at the Temple” ug “Feast of the Purification of the Virgin (Mary)” sa dihang ang mga Kristiyanos mohinumdom sa pagdala ni Mary ug Joseph sa Batang Hesus ngadto sa Jewish temple sa Jerusalem aron magpasalamat sa Dios sa paghatag kanila og anak. Importante kaayo kining maoy adlaw alang sa mga Orthodox ug Catholic churches.
Ang tawag nga Candlemas nagikan sa mga pulong “Candle mass” diin ang mga kandila bendisyonan nga maoy gamiton sa mga simbahan ug kaha ipanghatag ngadto sa mga tawo aron magamit sa ilang balay sa ilang pagpangadye. Sa ato pa ang Pasko matapus diay human sa gitawag og Candlemas kun Kandelarya sa Pebrero 2. (mannyrabacal1144@gmail.com)